20-nji aprelde paýtagtymyzda alty günläp dowam eden halkara hokkeý ýaryşy Türkmenistanyň «Galkan» toparynyň ajaýyp ýeňşi bilen tamamlandy. Final oýunda RF-niň Tatarystan Respublikasynyň «Adihis-Kazan» toparyndan 4:2 hasabynda üstün çykan ýurdumyzyň Içeri işler ministrliginiň hokkeý topary Gyşky oýunlar sport toplumyny dolduran ýüzlerçe janköýerine hakyky ussatlygyny görkezip, ynam bilen ýaryşyň başyny çekdi.
Günüň birinji ýarymynda «Feniks» bilen «Wolat» üçünji orun üçin duşuşyp, ýaryş Belarusuň güýçli hokkeý toparynyň uly hasapdaky ýeňşi bilen tamamlandy. Şunlukda, özbekleriň «Feniksinden» 4:12 hasabynda üstün çykan bu topar Aşgabatda geçen çekeleşikli ýaryşda üçünji orna mynasyp boldy.
Günüň ikinji ýarymynda geçirilen final duşuşygynda ýurdumyzyň dokuz gezek çempiony «Galkan» güýç babatynda deňeçer «Adihis-Kazan» bilen duşuşdy. Ýaryş örän çekeleşikli hem dartgynly bolsa-da, «Galkan» Russiýa Federasiýasynyň Tatarystan Respublikasynyň toparyndan 4:2 hasabynda üstün çykmagy başardy. Parahat Atekäýew, Gurbanmyrat Taňňyýew, Nowruz Baýhanow, «Adihis-Kazanyň» oýunçylary Adel Awzalow bilen Nasser Subhi bolsa bu owadan oýunda has tapawutlanmagy başardylar.
Ýewropanyň we Aziýanyň 10 ýurdundan toparlaryň gatnaşmagynda geçirilen halkara hokkeý ýaryşynyň ýapylyş dabarasy hem uly şatlyk-şowhuna beslendi. Onda eminlere we tapawutlanan oýunçylara şahsy baýraklar gowşuryldy. Belarus Respublikasynyň «Wolat», Russiýa Federasiýasynyň Tatarystan Respublikasynyň «Adihis-Kazan» toparlary, degişlilikde, üçünji we ikinji orunlaryň eýesi hökmünde bürünç hem kümüş medallar bilen sylaglanyldy. Türkmenistanyň Içeri işler ministrliginiň «Galkan» hokkeý toparyna bolsa ýaryşyň Kubogy dabaraly ýagdaýda gowşuryldy.
Paýtagtymyzda geçirilen bu iri sport baýramçylygy ýurdumyzda sportuň gyşky görnüşlerini, hususan-da, hokkeýi ösdürmäge uly üns berilýändiginiň, bu ugurda amatly şertlerdir mümkinçilikleriň döredilýändiginiň aýdyň beýany bolup, türkmen türgenleriniň ýokary netijeli sportda barha kämilleşýändiklerini nobatdaky gezek açyp görkezdi.
