Aşgabatda geçirilýän halkara hokkeý ýaryşynda üçünji oýun gününiň duşuşyklary tamamlandy.
«A» toparçada geçirilen ilkinji duşuşykda «Galkanyň» hokkeýçileri Eýranyň «Ice Box Iran Mall» toparyny 13:1 (6:0, 6:1, 1:0) hasabynda ýeňdi. Bu toparçadaky ikinji oýunda Özbegistanyň «Feniks» kluby Bahreýniň «Bahrain Ice Hockey Club» toparyny ýeňdi – 13:3 (5:0, 1:3, 7:0).
«B» toparçada Belarusyň «Volat» kluby Gazagystanyň «Akmola» toparyny ilkinji ýeňlişine sezewar etdi – 6:4 (2:0, 2:1, 2:3), şeýle-de «ADIHIC-Kazan» topary (Tatarystan Respublikasy, Russiýa Federasiýasy) «Team-Türkiýe» (Türkiýe) klubyny ýeňdi – 5:1 (3:0, 1:1, 1:0).
Üçünji günüň oýnlaryndan soň «Galkan» 9 utuk bilen «A» toparçada ynamly öňde barýar. Heniz ýeňlip görmedik «Feniks» 6 utuk bilen 2-nji orny eýeleýär. Eýranyň «Ice Box Iran Mall» toparynda 3 utuk bar. «Oman Nationals» (Oman) we «Bahrain Ice Hockey Club» heniz bir utuk hem gazanmady.
«B» toparçada 6 utuk toplan «ADIHIC-Kazan», «Volat» we «Akmola» öňdeligi eýeleýär. Şol bir wagtyň özünde Gazagystanyň hokkeýçileri bir oýny köp oýnady. «Dordoý» (Gyrgyzystan) we «Team-Türkiye» toparlarynyň heniz utugy ýok.
«Türkmen sporty» gazeti.
