Türkmenistanyň agyr atletika boýunça ýetginjekler ýygyndysy Durres şäherinde (Albaniýa) tamamlanan dünýä çempionatynyň jemi boýunça umumytoparlaýyn bäsleşikde 5-nji orny eýeledi. Türkmen türgenler jemi iki altyn we bir kümüş medal gazandylar.
13 ýaşly Ogulşat Amanowa (agramy 71 kg çenli) we 17 ýaşly Medine Amanowa (59 kilograma çenli) münberiň iň beýik basgançagyna çykdylar. Kümüş medaly 16 ýaşly Perhat Bagtiýarow (61 kilograma çenli) eýeledi.
Albaniýada geçirilen dünýä çempionatynda Türkiýeden gelen türgenler (6 medal) ýeňiji boldular. Filippinleriň türgenleri (5 medal) 2-nji orna mynasyp boldular. Gruziýanyň we Gazagystanyň türgenleri bolsa (hersi 4 medal) 3-nji orny paýlaşdylar.
57 döwlete wekilçilik edýän 268 türgen agyr atletika boýunça ýetginjekleriň arasyndaky dünýä çempionatyna gatnaşdy. Bäsleşik 25-nji martda başlandy we 1-nji aprelde tamamlandy. Bäsleşik her ýyl geçirilip, ol Halkara agyr atletika federasiýasynyň (IWF) howandarlygynda guralýar.
Albaniýada geçirilen ýetginjekleriň arasyndaky dünýä çempionatynda Gurbandurdy Amanowyň we Ahmed Saryýewiň ýolbaşçylygyndaky Türkmenistanyň ýygyndysyna 9 agyr atletikaçy wekilçilik etdi.
