«Bilim we sport Berkarar döwletimiziň bagtyýarlyk döwründe» ady bilen geçirilýän däbe öwrülen Halkara serginiň we ylmy maslahatyň bosagasynda bu abraýly foruma gatnaşmak üçin Aşgabada gelen meşhur rus tennisçisi Mihail Ýužnyý ussatlyk sapagyny geçirdi.
«Aşgabat» köpugurly stadionynyň döwrebap tennis kortlarynda guralan ussatlyk sapagyna ýaşajyk tennisçiler gatnaşdylar. Bu gyzykly tennis sapagyny synlamaga baran tomaşaçylar ussat tennisçiniň gatnaşmagyndaky gyzykly tomaşanyň şaýady boldular. 
Ýaşajyk tennisçiler ussat tennisçi bilen geçirilen duşuşykda ilkinji utuklaryny gazanandyklaryna begenseler, ene-atalar we tälimçiler olaryň şatlygyny deň paýlaşdylar. 
Dewisiň kubogynyň eýesi bolan we ATP-niň ýaryşlarynyň ençemesinde ýeňiş gazanan ussat tennisçi Mihail Ýužnyý ussatlyk sapagyndan soň «Aşgabat» köpugurly stadionynda guralan metbugat maslahatynda tennis hünärmenleridir muşdaklary we žurnalistler bilen pikir alyşdy. 
Mihail Ýužnyý  Türkmenistanda tennise diýseň uly üns berilýändiginiň özünde ýakymly tasir galdyrandygyny, şu gezekki saparyň dowamly boljakdygyny aýtdy.
Türkmenistanyň tennis federasiýasynyň baş kätibi Eziz Döwletow bolsa russiýaly ussat tennisçileriň tejribesini özleşdirmek we öwrenmek maksady bilen Mihail Ýužnynyň tälimçiler topary bilen gepleşikleriň alnyp barylýandygyny, geljekde bilelikde işlemek we hyzmatdaşlyk etmek babatda anyk işleriň durmuşa geçirilýändigini gürrüň berdi.
«Aşgabat» köpugurly stadionynda guralan metbugat maslahatynyň ahyrynda tennis muşdaklaryna meşhur tennisçi Mihail Ýužnydan ýadygärlik ýazgy almaga mümkinçilik döredildi.
Türkmenistanyň Sport we ýaşlar syýasaty ministrligi bilen Türkmenistanyň tennis federasiýasy bu çäräniň guramaçysy bolup çykyş etdi.
www.msy.gov.tm