2020-nji ýylda Aşgabatda geçiriljek futzal boýunça Aziýa çempionatynyň saýlama ýaryşlary dowam edýär. Häzirki wagta çenli türkmen paýtagtynda guraljak yklym ýaryşynda bäsleşjek ýygyndylaryň 5-si belli edildi.
TÜRKMENISTAN. Türkmenitanyň futzal toparyna Aziýa çempionatyny guraýan döwletiň ýygyndysy hökmünde yklymyň futzal ýaryşnyň final böleginde çykyş etmäge hukuk berildi. 2020-nji ýylyň 24-nji fewraly ― 10-njy marty aralygynda geçiriljek çempionatda Türkmenistanyň futzal ýygyndysy 7-nji gezek Aziýanyň çempionatyna gatnaşar.
KUWEÝT. Günbatar zolagyň «A» toparçasyny birinji orunda tamamlan Kuweýtiň futzal ýygyndysy Aziýa çempionatyna gatnaşmaga hukuk gazanan ilkinji ýygyndy boldy. Kuweýtiň ýygyndysy Aziýa çempionatynyň iň tejribeli ýygyndylarynyň biridir. Aşgabatdaky çempionat olar üçin 12-nji yklym ýaryşy bolar. Ýygyndy 2003-nji ýylda Eýranda, 2014-nji ýylda Wýetnamda geçirilen yklym ýaryşlarynda ýarym finala çykypdy.
BAHREÝN. Saýlama tapgyryň duşuşyklaryny öz janköýerleriniň arasynda geçiren bahreýinli futzalçylar kynlyk bilen ýeňijileriň hataryna goşuldylar. Olar BAE bilen deňlik oýnadylar. Soňra Palestinadan we Kuweýtden üstün çykdylar. Bu ýeňişler olara 2020-nji ýylyň fewralynda Türkmenistan gelmäge mümkinçilik berdi. Öňümizdäki birinjilik Bahreýniň ýygyndysy üçin üçünji yklym çempionaty bolar. Bahreýn diňe bir gezek çärýek finala çykmagy başarypdyr.
LIWAN. Liwan ilkinji duşuşygynda Omany 10:2, ikinji duşuşygynda Saud Arabystanyny 2:1, üçünji duşuşygynda Katary 8:1 hasabynda ýeňip, toparçada utuk ýitirmedik ýeke-täk ýygyndy boldy. Aşgabatdaky futzal baýramçylygy Liwanyň gatnaşýan 12-nji yklym çempionatydyr. Olar 2003-nji ýyldan bäri geçirilýän Aziýa çempionatlarynyň ählisine gatnaşyp, 7 gezek çärýek finala çykypdyrlar.
SAUD ARABYSTANY. Kynlyk bilen hem bolsa arap futzalçylary toparçada ikinji orny eýeläp, Aşgabadaky çempionata gatnaşmaga hukuk gazandylar. Saud Arabystanyň ýygyndysy Aziýa çempionatyna diňe 2016-njy ýylda gatnaşyp gördi. Şonda toparçada 3-nji orny eýelän ýygyndy 16 toparyň arasynda 12-nji orna düşüpdir.
