Belarusyň hokkeý federasiýasynyň başlygy Gennadiý Sawilow we Türkmenistanyň hokkeý federasiýasynyň başlygy Jora Hudaýberdiýew BHF bilen THF-nyň arasynda hyzmatdaşlyk hakynda Ylalaşyga gol çekmek dabarasyna gatnaşdylar.
Resminama ilkinji nobatda bu guramalaryň arasynda maglumat, usuly edebiýat, okuw-sport düzümlerinde türgenleşik işlerini guramak boýunça okuw meýilnamalaryny alyşmak, hokkeý boýunça hünärmenleri taýýarlamak we olaryň hünär ussatlygyny kämilleşdirmek, hokkeý boýunça çagalaryň we ýetginjekleriň (şol sanda gyzlaryň) arasynda geçirilýän halkara ýaryşlaryny, şol sanda IIHF-nyň baýdagy astynda geçirilýän ýaryşlary guramak we geçirmek boýunça tejribe alyşmak meselelerini öz içine alýan uzakmöhletleýin gatnaşyklary ösdürmäge gönükdirilendir.
Mundan başga-da, gol çekilen Ylalaşyga laýyklykda BHF hokkeý boýunça Türkmenistanyň milli çempionatyny geçirmek üçin kadalaşdyryjy resminamalary işläp düzmekde maslahatçylyk kömegini berer, şeýle hem Türkmenistanyň sport hünärmenleriniň Belarus Respublikasynyň çagalar-ýetginjekler sport mekdeplerinde we hokkeý klublarynda tejribe okuwlaryny geçmegine, Türkmenistanyň hokkeý boýunça milli çempionaty üçin BHF-nyň meýilanamasyny ornaşdyrmaga ýardam eder. Şeýle hem Belarus tarapy eminlik meselelerinde hem maslahatçylyk kömegini bermäge taýýardygyny mälim etdi.
Türkmenistanyň hokkeý federasiýasy 2015-nji ýylyň 15-nji maýynda Halkara hokkeý federasiýasynyň doly hukukly agzasy boldy.
Milli ýygyndylaryň arasynda Türkmenistanyň ýygyndysy IIHF-nyň hokkeý boýunça III dünýä çempionatynyň «A» diwizionynyň toparynda çykyş edýär.
