Soňky ýyllarda ýurdumyzda taekwondo uly meşhurlyga eýe bolýar. Ýakynda paýtagtymyzyň Olimpiýa şäherçesiniň Başa-baş söweş sungaty sport toplumynda çagalaryňdyr ýetginjekleriň arasynda sportuň bu görnüşiniň WT ugry boýunça Türkmenistanyň Milli taekwondo merkeziniň hem-de Koreýa Respublikasynyň Türkmenistandaky Adatdan daşary we Doly ygtyýarly ilçisiniň Kubogy ugrundaky ýaryş hem muny doly tassyklady.
Geçirilmegi asylly däbe öwrülen bu bäsleşik ýurdumyzda 2010-njy ýyldan bäri guralyp gelinýär. Bu gezek ýaryşa ýurdumyzyň paýtagtyndan, Arkadag şäherinden, Mary, Lebap hem-de Daşoguz welaýatlaryndan 100-den gowrak türgen gatnaşdy. Gyzlar we oglanlar aýratynlykda dürli agram derejelerinde bäsleşdiler. Netije de Aşgabat şäheriniň türgenleri 8 altyn, 11 kümüş, 7 bürünç medal, Arkadag şäherinden gatnaşan türgenler 1 altyn, 4 bürünç medal, Lebap welaýatynyň türgenler 2 kümüş, 5 bürünç medal, Mary welaýatynyň taekwondoçylary 20 altyn, 14 kümüş, 26 bürünç medal, Daşoguz welaýatyndan gelen türgenler 1 altyn, 2 kümüş, 4 bürünç medal gazandylar. Umumy topar laýyn hasapda Mary welaýatynyň türgenleri 60 medal gazanyp, Kuboga mynasyp boldular.
Sport häzirki döwürde Ýer ýüzünde parahatçylygy, dost-doganlygy we ynanyşmagy üpjün edýän ygtybarly serişde bolup durýar. Bu ýaryş hem türkmen-koreý dostlugynyň we hyzmatdaşlygynyň mundan beýläk-de pugtalandyrylmagynda uly ähmiýete eýe boldy.
«Türkmen sporty» gazeti
