Türkmen türgenleri Hemnisde (Germaniýa) geçirilen «Chemnitz Open 2024» karatedo ýaryşynda dürli derejeli 45 medal eýelediler. Bu barada «Altyn asyr» elektron gazeti habar berýär.

Bäsleşige 5 ýurtdan 953 türgen gatnaşdy, olar dürli ýaş derejesinde kata (formal maşklary görkezmek) we kumite (söweşler) ugurlary boýunça güýçlini kesgitlediler.

Türkmenistanyň toparynyň hataryny 18 türgen, 7 emin we 2 tälimçi düzdi.

Ýaryşyň ähli görnüşleriniň netijelerine görä, ildeşlerimiz 21 altyn, 12 kümüş we 12 bürünç medal gazandylar. Bu görkeziji boýunça türkmen karateçileri Germaniýanyň wekillerinden soň (97 altyn, 102 kümüş we 190 bürünç) medallar babatda ikinji orny eýelediler. Polşa (1 altyn, 3 kümüş we 2 bürünç), Çehiýa (1 kümüş we 1 bürünç) we Nepal (2 bürünç) toparymyzdan yza galdylar.