Tatarystan Respublikasynyň Kazan şäherinde guşakly göreş boýunça ulularyň arasyndaky dünýä çempionatynyň hem-de 20 ýaşa çenli ýaşlaryň arasyndaky dünýä birinjiliginiň Türkmenistanyň ýygyndy toparynyň uly üstünligi bilen jemlenmegi sportuň bu görnüşinden milli mekdebimiziň ajaýyp ýeňşine öwrüldi. Dünýä çempionatynda 34 ýurda wekilçilik eden türgenleriň 250-den gowragy baýrakly orunlar ugrunda göreşdi.
Ulularyň dünýä çempionatynda Türkmenistanyň Goranmak ministrliginiň çagyryş boýunça harby gullukçylary Abdyresul Durdyýew (62 kg) bilen Pälwan Gurbangeldiýew (100 kg) hem-de Türkmen döwlet maliýe institutynyň 3-nji ýyl talyby Annagurban Allaberdiýew (90 kg) garşydaşlarynyň ählisinden üstün çykyp, altyn medallary gazanmagyň hötdesinden geldiler. Türkmen döwlet bedenterbiýe we sport institutynyň 5-nji ýyl talyby Nurmuhammet Baýdogdyýew (100 kilogramdan ýokary agram) guşakly göreşiň nusgawy görnüşi boýunça hormat münberiniň ikinji basgançagyna çykdy. Şol ýokary okuw mekdebiň ikinji ýyl talyby Aşyrmyrat Amandurdyýew (57 kg), Kemal Nurgeldiýew (68 kg) hem-de Dawut Nazarow (100 kilogramdan ýokary agram), Goranmak we Içeri işler ministrlikleriniň çagyryş boýunça harby gullukçylary Nobatgeldi Nazarow (100 kg), Azymmuhammet Orazmuhammedow (75 kg) bürünç medallara mynasyp boldular. Şeýlelikde, ulularyň arasyndaky dünýä çempionatynda türkmen topary 3 altyn, 1 kümüş we 5 bürünç medal gazandy.
18 — 20 ýaşly türgenleriň arasyndaky dünýä birinjiliginde bolsa Türkmen döwlet bedenterbiýe we sport institutynyň talyplary Guwanç Hemraýew (82 kg) hem-de Dawut Nazarow (100 kg-den ýokary agram), Türkmen döwlet maliýe institutynyň talyby Annagurban Allaberdiýew (90 kg) dagy ýurdumyzyň baýrak gaznasyna altyn medallary getirdi. Türkmen döwlet bedenterbiýe we sport institutyna wekilçilik edýän ýaşlaryň ýene biri Kemal Nurgeldiýew (68 kg) üçünji orny eýeledi. Bu netijeler türkmen ýygyndysynyň agzalarynyň ýaşlaryň arasyndaky dünýä birinjiliginde 3 altyn, 1 bürünç medallara eýe bolandyklaryny görkezýär.
«Türkmen sporty» gazeti
