Türkmen tennis mekdebiniň wekilleri üçin üstünlikli geçýän «Ashgabat Open 2024» halkara ýaryşynyň nobatdaky oýun gününde oglanlaryň we gyzlaryň arasyndaky jübütleriň ýaryşlary tamamlandy. Bu ýaryşa 12 ýurtdan türgenler gatnaşdy.

2 sagat 15 minut dowam eden erkekleriň finalynda ildeşlerimiz Nazar Amangeldiýew we Kerimgeldi Welibegow türkmenistanly Ýunus Annamyradowy we Aly Geldiýewi iki setde taý-breýk bilen ýeňip, üstün çykdy-7:6 (7:4), 7:6 (7:4).

Gyzlaryň arasyndaky jübütleriň ýaryşynda türkmen tennisçileri Ilima Guseýnowa we Aýlara Kakabaýewa ildeşlerimiz Aýnur Annamyradowa we Nazly Hudaýkulyýewany 6:4, 6:1 hasaby bilen ýeňip, ýeňiji boldy.

Final duşuşyklarynyň öňüsyrasynda geçirilen ýarym final duşuşyklarynda gyzlaryň arasyndaky ýaryşda ýekelikde çykyş eden Ilima Guseýnowa Sülgün Işangulyýewany 6:3, 6:2 hasaby bilen ýeňdi, Aýlara Kakabaýewa bolsa Nazly Hudaýkulyýewadan 5:7, 6:1, 6:3 hasap bilen üstün çykdy.

Şeýlelikde, gyzlaryň ýekelikdäki final duşuşygynda Ilima Guseýnowa we Aýlara Kakabaýewa duşuşar. Üçünji orun üçin geçiriljek oýunda bolsa Nazly Hudaýkulyýewa bilen Sülgün Işangulyýewa bäsleşer.

Erkekleriň ýekelikdäki finalynda baş baýrak ugrunda Süleýman Hudaýberdiýew (Türkmenistan) we Muhammad Usmani (Pakistan) bäsleşer. Üçünji orun üçin geçiriljek oýunda malaýziýaly tennisçiler Garett Lim Hao Çže we Jeýkob Wong duşuşar.

Ýekelikde oýnaýan tennisçileriň final duşuşyklary 16-njy noýabrda Türkmenistanyň paýtagtyndaky Olimpiýa şäherjiginiň Tennis toplumynda geçiriler.