Türkmenistanyň «Altyn asyr» topary Hindistanyň «Ist Bengal» klubyny myhmançylykda 2024/25-nji ýylyň AFK-2 Çempionlar ligasynyň saýlama duşuşygynda ýeňip, bäsleşigiň topar tapgyryna çykdy.
Kalkuttada geçirilen duşuşyk Ýazguly Hojageldyýewiň şägirtleriniň 3:2 hasably ýeňşi bilen tamamlandy.
7-nji minutda «Ist Bengal» David Lalhlandanganyň geçiren goly bilen öňe saýlandylar. «Altyn аsyr» 17-nji minutda Myrat Annaýewiň geçiren goly bilen hasaby deňledi. 28-nji minutda Selim Nurmyradow "Altyn Asyry" ilkinji gezek hasapda öňe çykardy. Şeýlelikde, duşuşygyň birinji ýarymy türkmen toparynyň 2:1 hasabyndaky ýeňşi bilen tamamlandy.
Duşuşygyň 52-nji minudynda "Altyn Asyr" ýer eýeleriniň derwezinden üçünji pökgini hem geçirdi. Bu gezek Mihail Titow tapawutlandy. "Ist Bengal" 59-njy minutda S.Kresponyň geçiren goly bilen aralygy ýygran hem bolsa, "Altyn Asyr" duşuşygyň galan minutlarynda berk goranyp, ýer eýeleriniň hasaby deňlemegine mümkinçilik bermedi.
Aşgabat klubynyň AFK-2 Çempionlar ligasynyň topar tapgyryndaky bäsdeşleri 16-njy awgustda Kuala-Lumpurda geçiriljek bije çekiş dabarasynyň netijesinde kesgitlener, “Altyn asyr" bije çekilişikde dördünji sebede düşer.
«Türkmen sporty» gazeti
