Türkmen türgenleri 6 – 10-njy awgust aralygynda Gazagystan Respublikasynyň Aktau şäherinde geçirilen boks boýunça halkara ýaryşda üstünlikli çykyş etdiler. Bokenbaý Saktaganowyň ýadygärligine bagyşlanan bäsleşige Türkmenistandan, Täjigistandan, Özbegistandan, Garagalpak Respublikasyndan hem-de Gazagystanyň dürli şäherlerinden türgenler gatnaşdylar.
Türkmenistanyň ýaşlar ýygyndy toparynyň 9 türgeni dürli agram derjelerinde ringe çykdy. Olara boks boýunça milli ýygyndy toparymyzyň baş tälimçisi Tenilbek Džumakulow, ýaşlar ýygyndy toparymyzyň tälimçisi Maksud Şeripow hem-de milli derejeli emin Timur Halilow halypalyk etdi. Türkmen boksçylary halkara ýaryşy 6 medal (1 altyn, 1 kümüş, 4 bürünç) bilen jemlediler.
Mary welaýatynyň Ýolöten etrabynyň 1-nji orta mekdebiniň okuwçysy Jeýhun Döwranow 54 kg agram derejesinde çykyş edip, altyn medala mynasyp boldy. Aşgabat şäheriniň 32-nji orta mekdebiniň okuwçysy Meýlis Şadurdyýew 57 kg agram derejesinde kümüş medal gazandy. Aşgabat şäheriniň 52-nji orta mekdebiniň okuwçysy Hangeldi Lukmanow (48 kg), Aşgabat şäheriniň 82-nji orta mekdebiniň okuwçysy Mekan Sabyrow (60 kg), Mary welaýatynyň Baýramaly etrabynyň Guşly oba geňeşliginiň 2-nji orta mekdebiniň okuwçysy Annageldi Jumamyradow (63,5 kg) we Daşoguz welaýatynyň Boldumsaz etrabynyň daşary ýurt dillerine ýöriteleşdirilen 57-nji orta mekdebiniň okuwçysy Atageldi Seýidow (67 kg) bürünç medallara mynasyp boldular.
Halkara ýaryşda Jeýhun Döwranow ýaryşyň iň ökde boksçysy diýlip yglan edildi.
«Türkmen sporty» gazeti
