43 ýaşly futbol hünärmeni Döwletmyrat Annaýew baş tälimçi hökmünde Türkmenistanyň ýaşlar (20 ýaşa çenli) ýygyndy toparyny Aziýa Kubogy – 2025-iň saýlama oýunlaryna taýýarlar.

25–29-njy sentýabr aralygynda Bişkekde geçiriljek Aziýa Kubogy – 2025-iň saýlama ýaryşynda türkmen futbolçylarynyň bäsdeşleri Ýaponiýanyň, Gyrgyzystanyň we Mýanmanyň ýaşlar toparlary bolar. Bular «I» toparyna girýärler.

Aziýa Kubogy – 2025-iň saýlama oýunlaryna taýýarlygyň çäginde Döwletmyrat Annaýewiň topary 5–12-nji iýul aralygynda Jalal-Abat şäherinde (Gyrgyzystan) geçiriljek ýaşlar (20 ýaşa çenli) toparlarynyň arasynda Merkezi Aziýa Futbol Assosiasiýasynyň (CAFA) çempionatyna gatnaşar.

Bu ýaryşyň birinji tapgyrynda türkmen futbolçylary «B» toparda Eýranyň we Özbegistanyň toparçalary bilen oýnar. «A» toparynda Täjigistanyň, Gyrgyzystanyň we Owganystanyň ýaşlar ýygyndy toparçalary çykyş eder.

Toparlaryň ýeňijileri finala çykarlar. Öz toparlarynda ikinji orny eýeleýän toparçalar bolsa bürünç medallar ugrunda bäsleşer. Şeýle hem bäşinji we altynjy ýerler üçin teselli oýny geçiriler.

Döwletmyrat Annaýew Türkmenistanyň ýaşlar ýygyndy toparynyň (U20) baş tälimçisi wezipesine bellenmezden ozal, milli futbol çempionatynyň ikinji aýlawyndan başlap, «Ahal» topary türgenleşdirdi. Özi-de üstünlikli. Onuň ýolbaşçylygynda «Ahal» topary Türkmenistanyň çempionatynyň 8 oýnunda 6 ýeňiş gazandy, «Altyn asyr» topary bilen oýnan bir oýnuny 2:2 hasabynda deňme-deň tamamlady we diňe bir oýunda ýurduň häzirki çempiony «Arkadag» toparyndan utuldy – 0:4.

«Türkmen sporty» gazeti