Futbolda toparçalaýyn bäsleşiklerde gazanylan islendik utugyň netije berýändigi janköýerlere mälimdir. Haçan-da, utulan-çykdy tapgyry başlananda, tälimçileriň oýna girizýän taktiki tilsimleri ilkinji nobata çykýar. Sebäbi, netije iki oýnuň netijesi boýunça kesgitlenýär. Ine, ýakynda AFK-nyň Kubogynyň interzolagynyň birinji ýarym finalynda myhmançylykda çykyş eden paýtagtymyzyň «Altyn Asyr» topary hem umumy üstünlige uly mümkinçiliginiň bardygyny görkezdi.
Oýun güni. Wýetnamyň Hanoý şäheriniň «Hangdaý» stadiony. Duşuşygyň bir gün öňüsyrasy geçen güýçli çagbanyň täsirinde geçen oýunda ýerli futbolçylaryň özlerini oňaýly duýjakdyklary görnüp durdy. Şol sebäpli-de, dessine hüjüm futboluny öňe sürmeli diýen netijä gelen tälimçimiz Ýazguly Hojageldiýewiň bu pikiriniň oýnuň jemine seredeniňde netije berendigini görmek bolýar. Oýnuň dowamynda garşydaşynyň goragyny aldym-berdime salan Murat Ýakşiýew bilen Myrat Annaýew jübüti eminiň jürlewük çalan dessine netijeli kombinasiýany geçirmegi başardylar. M.Annaýewiň jüpüne düşen pasyny netijeli peýdalanan M.Ýakşiýew ilki bolup hasaby açmagy başardy. Şol pursat oýnuň 4-nji minuty dowam edýärdi.
Şondan soň esasy ünsüni goragda jemlän toparymyz birinji ýarymyň 40-njy minutyna çenli bu hasaby saklamagy başardy. Ýöne muňa garamazdan, hüjümde netijeli çykyş edip bilmedik ýer eýeleriniň nesibeli goly jerime urgusyndan soň geldi. «Hanoýa» deňlik getiren topy oýnuň 41-nji munutynda jerime urgusyndan Nguýen Kuang Haý geçirdi.
Ikinji ýarymyň ilkinji minutlaryny hüjümde geçiren ýer eýeleri oýnuň 61-nji minutynda hasaby 2:1-e çykardylar. Bu gezek hem goragçylarymyzdyr derwezeçi Nguýen Kuang Haýyň urgusyna çäre tapyp bilmediler. Onuň yzysüresi birnäçe hüjüm guran futbolçylarymyz özlerini kanagatlandyrýan deňligiň tabloda peýda bolmagyny gazandylar. Netijeli urgyny 64-nji minutda paýtagtymyzyň toparynyň ezber oýunçysy Altymyrat Annadurdyýew geçirdi.
Umuman, oýnuň 80-nji minutyna çenli toparymyz garşydaşy bilen deň derejede bäsleşdi diýsek hakykatdan daş düşmeris. Ýöne howa ýagdaýlary azda-kände oýna öz täsirini ýetirdi. Soňky pursatlary oýny goragda geçirmeli bolan «Altyn Asyryň» oýunçylary üçünji topy derwezelerinden çykarmaly boldular. Oýnuň 88-nji minutynda Koreýa Respublikasyndan bolan eminiň bellän 11 metrlik urgusyny ýerli toparyň oýunçysy Wan Kuýet Nguýen netijeli urga öwürdi. Şondan soň toparlaryň eden hüjümleri netije bermedi.
Makalamyzyň başynda hem belläp geçişimiz ýaly, myhmançylykda geçirilen netijeli urgular jogap oýnuň öňüsyrasy toparymyza indiki tapgyra çykmaga gowy mümkinçilik goýýar. Şonuň üçin hem, geçen möwsüm AFK-nyň Kubogynyň finalynda çykyş eden Ýazguly Hojageldiýewiň şägirtleri paýtagtymyzda geçiriljek jogap oýnuna sowukganlylyk bilen çemeleşseler, netije hökman geler. Bu olaryň diňe özlerine bagly.
AFK-nyň Kubogynyň ýarym finalynyň jogap oýnunyň 27-nji awgustda 17:00-da paýtagtymyzyň «Köpetdag» stadionynda geçirilýändigini ýatladýarys.
Bu gapma-garşylygyň ýeňijisi AFK-nyň interzolagynyň finalynda «Abahani Limited» (Bangladeş) – «Aprel 25» (Demirgazyk Koreýa) toparlarynyň arasynda geçiriljek duşuşygyň ýeňijisi bilen duşuşar
