Türkmen döwlet bedenterbiýe we sport institutynyň köpugurly sport toplumynda 2007—2009-njy ýyllarda doglan ýetginjekleriň hem-de 2004 — 2006-njy ýyllarda doglan ýaşlaryň arasynda kuraş boýunça Türkmenistanyň birinjilikleri, şeýle hem ulularyň arasyndaky ýurdumyzyň çempionaty geçirildi. Ýaryşy Türkmenistanyň Bedenterbiýe we sport baradaky döwlet komiteti hem-de ýurdumyzyň Kuraş federasiýasy gurady.

Aşgabat şäherinden we ýurdumyzyň ähli welaýatlaryndan oglan-gyzlaryň ýüzlerçesini bir ýere jemlän ýaryş dartgynly hem-de gyzykly tutluşyklara baý boldy.

2007 — 2009-njy ýyllarda doglan oglanlaryň arasynda gazanylan medallaryň umumy sany boýunça Lebap welaýatynyň topary öňdeligi eýeledi. 2-nji orna paýtagtymyzyň ýygyndysy eýe boldy. Şu ýaş derejesinde gyzlaryň arasynda hem Lebap welaýatynyň ýygyndysy 1-nji orny elden bermedi. 2-nji ýeri Mary welaýatynyň topary eýeledi.

2004 — 2006-njy ýyllarda doglan oglanlaryň bäsleşiginde Aşgabat şäheri birinji, Lebap welaýaty 2-nji orunlara mynasyp boldular. Gyzlaryň arasynda Lebap welaýatynyň türgenleri 1-nji, paýtagtlylar bolsa 2-nji orny eýelediler.

Ulularyň arasyndaky Türkmenistanyň çempionaty has-da dartgynly geçdi. Erkekleriň arasynda altyn medallaryň ählisini gazanan Aşgabat şäheriniň ýygyndysy toparlaýyn hasapda hem öňe saýlandy. 2-nji orny Lebap welaýatynyň pälwanlary eýelediler. Zenanlaryň arasynda bolsa Lebap welaýatynyň türgenleri 1-nji orny eýelemegiň hötdesinden geldiler. Aşgabat şäheriniň ýygyndysy 2-nji orna mynasyp boldy.

Ýurdumyzyň birinjiliginiň hem-de Türkmenistanyň çempionatynyň ýeňijileri Hormat hatlarydyr ýadygärlik sowgatlar bilen sylaglanyldy.

«Türkmen sporty» gazeti.