Türkmenistanyň Gahrymany Oleg Kononenko älem giňişliginde bolan wagtynyň jemi dowamlylygy boýunça täze rekordy goýdy. «Roskosmosdan» ynamdar çeşmeleriň resmi taýdan güwä geçmegine görä, 4-nji fewralda 11 sagat 30 minut 8 sekuntda O. Kononenko älem giňişliginde iň köp wagtlap bolan adama öwrüldi. Ol özünden öň ildeşi Gennadiý Padalkanyň gazanan rekord üstünligini täzeledi. G. Padalka älem giňişligine amala aşyran bäş gezekki uçuşynyň dowamynda 878 gije-gündiz 11 sagat 29 minut 48 sekunt netije gazanypdy.
O. Kononenko häzirki wagtda Halkara kosmos stansiýasyndan indi bäşinji uçuşyny amala aşyrýar (ilkinji gezek ol 2008-nji ýylda şol ýerden älem giňişligine çykypdy). Häzirki wagtda hereket edýän beýleki rus kosmonawtlarynyň ählisiniň uçuşlarynyň sany üç gezekden köp däldir. O. Kononenko Halkara kosmos stansiýasyna 2023-nji ýylyň 15-nji sentýabrynda «Soýuz MS-24» howa gämisinde russiýaly Nikolaý Çub we amerikaly zenan Loral O'Hara bilen bilelikde uçup geldi.
Amerikaly astronawt zenan şu ýylyň ýazynda Ýere dolanyp geler. A. Kononenko bilen N. Çubuň ekspedisiýasy bolsa ýene-de ýarym ýyllap dowam eder. Olar şu ýylyň 23-nji sentýabrynda dolanyp gelerler. Şu möhletiň dowamynda O. Kononenko orbitada müň günden köpräk wagtyny geçiren ilkinji kosmonawt bolmaga hem ýetişer. «Roskosmosda» belleýişleri ýaly, bu wagt çägini ol 5-nji iýunda 00:00:10-da geçer. Kosmonawtyň Ýere dolanyp geljek pursadynda bolsa bu wagt ölçegi 1110 güne barabar bolar.
«Türkmenistan Sport» halkara žurnalynyň redaksiýasynda terjime edildi.
