«Arkadag» futbol kluby, Türkmenistan çempionatynyň 2024-nji ýyldaky täze möwsümine taýýarlygyň çäginde ilkinji gezek ýoldaşlyk oýnuny geçirdi. Türkmenistanyň Futbol federasiýasynyň habar bermegine görä, duşuşyk Türkiýäniň Antalýa şäherinde guraldy. Topar şol ýerde okuw-türgenleşik ýygnanyşygyny geçirýär.

Demirgazyk Makedoniýanyň «Wardar» topary bilen geçirilen oýunda baş tälimçi Wladimir Baýramowyň türgenleşdirýän topary 1:0 hasabynda ýeňiş gazandy. Ýeke-täk pökgini hüjümçi Altymyrat Annadurdiýew tora girizdi.

«Arkadag» geçen ýylyň aprel aýynda esaslandyrylyp, milli ýaryşlarda goşa üstünlik gazandy — möhletinden öň çempion boldy we Türkmenistan kubogyny gazandy.

Bu ýyl «Arkadag» çempionlygyny goramaga taýynlanýar. Ýokary liganyň klublarynyň arasynda Türkmenistan futbol çempionatynyň täze möwsümine 4-nji martda badalga bermek meýilleşdirilýär.