27-nji dekabrda «Arkadag Serdarly bagtyýar ýaşlar ýyly» şygary astynda tamamlanyp barýan ýylyň jemlerine bagyşlanyp geçirilen halkara ylmy-amaly maslahatyň ahyrynda ýylyň dowamynda aýratyn tapawutlanan ýaşlary, şol sanda Arkadag şäheriniň «Arkadag» futbol toparyny, noýabr aýynda Aşgabatda geçirilen Kuraş boýunça XIV dünýä çempionatynda ýokary netijeleri gazanan türgenleri, olary bu iri halkara ýaryşa taýýarlan tälimçileri sylaglamak dabarasy boldy.
Hormatly Prezidentimiz Serdar Berdimuhamedowyň Buýrugyna laýyklykda, futbol boýunça Türkmenistanyň çempiony we ýurduň Kubogynyň eýesi bolan «Arkadag» futbol toparyna «MAN RR3 19.440 EEV» kysymly awtobusyň açary gowşuryldy. Bu futbol toparynyň şu ýyl türkmen halkynyň Milli Lideri Gurbanguly Berdimuhamedowyň başlangyçlary netijesinde bedenterbiýe we sport bilen meşgullanmak üçin ösen infrastruktura döredilen täze Arkadag şäherinde esaslandyrylmagynyň ýurdumyzyň sport durmuşynda möhüm waka bolandygyny, futbolyň mundan beýläk-de ösmegine kuwwatly itergi berendigini bellemek gerek.
Aziýanyň, Afrikanyň, Ýewropanyň, Günorta we Demirgazyk Amerikanyň wekillerini paýtagtymyzda jemlän Kuraş boýunça dünýä çempionatynda türkmen pälwan jemi 15 agram derejesinde 15 medal gazandylar. Ine, şol gün bu ýaryşda altyn medaly gazanan türgenlere hem-de ýurdumyzyň tälimçi-mugallymlaryna sowgat hökmünde 2 sany «Toyota Camry V6» we 5 sany «Toyota Fortuner SR5» kysymly 2023-nji ýylda öndürilen awtoulagyň açarlary dabaraly ýagdaýda gowşuryldy.
Şeýle hem Türkmenistanyň Bedenterbiýe we sport baradaky döwlet komitetiniň Türkmenistanyň Ýokary sport ussatlygy mekdebiniň kuraş görnüşi boýunça tälimçi-mugallymy Dörtguly Tejenowa, Türkmenistanyň Bedenterbiýe we sport baradaky döwlet komitetiniň Lebap welaýat Bedenterbiýe we sport baradaky baş müdirliginiň Türkmenabat şäherindäki 7-nji sport mekdebiniň tälimçi-mugallymy Şirin Kubaýewa «Türkmenistanyň at gazanan tälimçisi» diýen hormatly atlar dakyldy.
Şa serpaýlarynyň eýeleri hormatly Prezidentimiz Serdar Berdimuhamedowa we Türkmenistanyň Halk Maslahatynyň Başlygy Gahryman Arkadagymyza tüýs ýürekden hoşallyk bildirip, alkyş sözlerini aýtdylar, mundan beýläk hem Watanymyzyň sport abraýynyň belende göterilmegi ugrunda ähli tagallalary etjekdiklerine ynandyrdylar.
«Türkmen sporty».
