Arkadagly Gahryman Serdarymyzyň saýasynda, ýurdumyzyň her bir ulgamynda, şol sanda milli sportumyzda dünýä derejeli üstünlikler gazanyldy. Muňa milli türgenlerimiziň ýurdumyzda we dünýä döwletlerinde geçirilen halkara sport bäsleşiklerinde gazanan ynamly üstünlikleri, altyn, kümüş we bürünç medallary hem aýdyň şaýatlyk edýär.
Türkmenistanyň Ministrler Kabinetiniň şu ýylyň 11 aýynyň jemlerine bagyşlanan mejlisinde hasabat berlişi ýaly, milli türgenlerimiz şu ýylyň 1-nji dekabryna çenli bolan döwürde medallaryň jemi 739-syny gazandylar. Munuň özi Arkadagly Gahryman Serdarymyzyň öňde goýýan wezipelerinden ugur alýan Türkmenistanyň Bedenterbiýe we sport baradaky döwlet komitetiniň we onuň garamagyna girýän sport edaralarynyň, mekdepleriniň, federasiýalarynyň we beýleki guramalarynyň jebis we agzybirlikli halal zähmetiniň netijesidir diýip ynam bilen aýtmak bolar.
Paýtagtymyzda geçirilen Kuraş boýunça XIV dünýä çempionatynda milli türgenlerimiz altyn medallaryň 5-sini, kümüş medallaryň 6-syny, bürünç medallaryň 4-sini gazanmak bilen, agzalyp geçilen sport görnüşi boýunça öz güýçlerini, gujur-gaýratlaryny görkezdiler. Şonuň ýaly-da, Amerikanyň Birleşen Ştatlarynda geçirilen Uşu boýunça XVI dünýä çempionatynda hem milli ýygyndy toparymyzyň türgenleri özleriniň ukyp-başarnyklaryny aýdyň görkezip, medally dolandylar.
Garaşsyz döwletimiziň geljegi bolan ýaşlarymyzyň her bir gazanýan üstünlikleriniň Arkadagly Gahryman Serdarymyzyň nazaryndan sowlup geçmeýändigi biz üçin buýsandyryjy ýagdaýdyr. Döwlet Baştutanymyz 30-njy noýabrda geçiren Ministrler Kabinetiniň nobatdaky mejlisinde tamamlanyp barýan Arkadag Serdarly bagtýar ýaşlar ýylymyzda ýurdumyzyň ähli ulgamlarynda, şol sanda sport ulgamynda gazanylan üstünliklerde ýaşlaryň uly ornunyň bolandygyna ünsi çekip, ýylyň ahyrynda Ýaşlaryň dabaraly maslahatynyň we sergisiniň geçiriljekdigini aýtdy we ýaşlaryň alyp baran işlerine, gazanan netijelerine mynasyp baha beriljekdigini, olary sylaglamak bilen geljekki uly üstünliklere ýol açyljakdygyny nygtap, degişli ýolbaşçylara guramaçylyk toparynda ýaşlarymyzy çeken zähmetine, gazanan üstünliklerine görä sylaglamak meselesine seretmek we degişli teklipleri taýýarlamak babatda tabşyryk berdi.
Häzirki wagtda döwlet Baştutanymyzyň beren tabşyryklaryny ýerine ýetirmek bilen bagly döredilen Arkadag Serdarly bagtyýar ýaşlar ýylyny jemlemek boýunça guramaçylyk topary tarapyndan Arkadag Serdarly bagtyýar ýaşlar ýylynyň jemlerine bagyşlanan halkara ylmy-amaly maslahaty we sergini guramaçylykly geçirmek üçin yzygiderli işler alnyp barylýar.
Biz ýurdumyzda ýaşlaryň bagtyýar geljegi üçin uly mümkinçilikleri döredip berýän Gahryman Arkadagymyza, Arkadagly Gahryman Serdarymyza uzak ömür, jan saglyk, döwletli başlangyçlarynda hemişe üstünlik arzuw edýäris.
Agabaý AKMYRADOW,
Türkmen döwlet bedenterbiýe we sport institutynyň
sport žurnlistikasy hünäriniň talyby.
