Huançžou şäherinde XIX tomusky Aziýa oýunlary açyldy. XIX tomusky Aziýa oýunlarynyň açylyş dabarasy «Uly Lotus» diýlip atlandyrylýan we 80 müň tomaşaçy kabul edýän Huançžou Olimpiýa sport merkeziniň stadionynda geçirildi.

Üç robot XIX tomusky Aziýa oýunlarynyň resmi nyşany hökmünde saýlanyp alyndy: Çençen, Kongkong we Lýanlýan. 

Ýaryşlar sportuň 40 görnüşinde 61 ugur boýunça 8-nji oktýabra çenli     dowam eder. 45 ýurda wekilçilik edýän 11 934 türgen 481 medal toplumy ugrunda bäsleşer. Mundan başga-da, Parižde geçiriljek 2024-nji ýyldaky Olimpiýa oýunlaryna sportuň 9 görnüşi boýunça 74 ýollanma ugrunda bäsleşiler.

Resmi wekiliýetler elipbiý tertibinde stadionyň arenasyndan geçdiler. Parady Owganystanyň wekiliýeti açdy. Aziýa oýunlaryna gatnaşýan 45 ýurduň ähli toparlary onuň bilen bilelikde «sahna» çykdylar. Olaryň arasynda Türkmenistanyň milli ýygyndysy hem bardy.

Türkmen türgenleri sekizinji gezek tomusky Aziýa oýunlaryna gatnaşýarlar.