Paýtagtymyzyň «Galkynyş» köpugurly sport toplumynda geçen grek-rim göreşi boýunça Türkmenistanyň kubogy ugrundaky ýaryş Aşgabadyň we ýurdumyzyň welaýatlarynyň iň güýçli türgenlerini özünde jemledi. Sportuň bu görnüşi boýunça Olimpiýa oýunlarynda ýurdumyzyň sport abraýyny goramak hukugyna türgenleriň dördüsi ― Lebap welaýatyndan Azat Açilow (63 kg çenli) hem-de Şermet Permanow (77 kg çenli), şeýle hem paýtagtly pälwanlar Seýdulla Täzäýew (67 kg çenli) bilen Şihazberdi Öwelekow (87 kg çenli) dalaş edýärler.
Kubok ýaryşynda altyn medaly eýelemek bilen olaryň hemmesi diýen ýaly özleriniň ýurdumyzda iň güýçli pälwanlardygyny subut etdiler. Diňe Ş. Permanow, hünärmenleriň öziniň üstünlikli çykyş etjekdigi hakynda edýän pikirlerine garamazdan, paýtagtly türgen Jeýhun Öwezdurdyýewden 3:5 hasabynda garaşylmadyk ýerden ýeňildi.
Indi Şermet öňümizdäki ýylda geçiriljek seçip alyş ýaryşlaryna çenli galan wagtda milli ýygyndymyzyň hatarynda ymykly orun almak üçin ykjam taýýarlyk görmeli bolar.
Şeýle hem bu ýaryşda Maksat Gurdow (55 kg çenli), Merdan Allaýarow (60 kg çenli), Azym Annamämmedow (72 kg çenli), Agajan Orazow (82 kg çenli), Arslan Kulyýew (97 kg çenli) we Şazada-Aýbek Kürräýew (130 kg çenli) ýeňiş gazanyp, ýaryşyň baş baýragyna mynasyp boldular. Umumy toparlaýyn hasapda Aşgabadyň ýygyndysy (bäş altyn medal) ýeňiş gazandy. Olary Türkmenistanyň at gazanan tälimçisi Rozy Rejepow bilen halkara derejeli emin Aman Geldiýew ýaryşa taýýarlady. Üç gezek altyn medala mynasyp bolan Lebap welaýatynyň türgenleri (tälimçi Gurbandurdy Durdyýew) ikinji orny eýelediler. Iki gezek ýeňiş gazanan Mary welaýatynyň ýygyndy topary bolsa (tälimçi Ýagşymyrat Kürräýew) hormatly üçünji orny eýeledi.
Grek-rim göreşi boýunça Tokio Olimpiadasyna ýollanma alamaga mümkinçilik berýän ýaryşlaryň birinjisi 22-25-nji martda Hytaýyň Sian Şäherinde geçer. Ol ýaryşa Aziýa yklymynyň iň güýçli türgenleri ýygnanyşar. Sofiýada (Bolagariýa) 28-nji aprelden 3-nji maýa çenli aralykda geçjek beýleki ýaryş bolsa dünýäniň iň ezber türgenlerini özünde jemlär. 2020-nji ýylda geçjek Olimpiýa oýunlaryna gatnaşmaga hukuk berýän arzyly ýollanma eýe bolmak üçin bu ýaryşlarda finala çykmak gerek.
«Нейтральный Туркменистан» gazeti (30.12.2019)
