Türkmenistanly türgeniň Ýetginjekleriň III Gyşky Olimpiýa oýunlaryna gatnaşjakdygy baradaky habar türkmen sportunda taryhy wakadyr. Bu abraýly ýaryş 2020-nji ýylyň 9-22 ýanwarynda Lozannada (Şweýsariýa) geçer. Şeýle ýaryşlara türkmen türgenleriniň ilkinji gezek gatnaşýandygy bellärliklidir.
Munuň özi Hormatly Prezidentimiz tarapyndan Türkmenistanda sporty we olimpiýa hereketini ösdürmek üçin durmuşa geçirilen ägirt uly işleriň öz miwesini berýändiginiň aýdyň ýüze çykmasy bolup durýar. Mähriban Arkadagymyzyň tagallasy bilen sportuň olimpiýa görnüşleriniň sanawyna girýän gyşky sport görnüşleri hem yzygiderlli ösüşlere eýe bolýar.
Muňa Türkmenistanyň ýetginjekler ýygyndy toparynyň 2019-njy ýylda Ýužno-Sahalinsk şäherinde (Russiýa Federasiýasy) geçen «Aziýanyň çagalary» atly halkara gyşky sport oýunlaryna gatnaşmagy hem aýdyň mysal bolup durýar. Bu oýunlaryň hokkeý boýunça ýaryşlarynda türkmen hokkeýçileri ýaşajyk kapitan Nowruz Baýhanowyň ýolbaşçylygynda buzly meýdança çykypdylar.
Olimpiýa Hartiýasy tarapyndan kesgitlenen seçip alyş düzgünlerine laýyklykda türgen ýa-da tutuş topar resmi halkara ýaryşlarynda ýokary netije görkezip, Olimpiýa oýunlaryna gatnaşmaga hukuk berýän ýollanma eýe bolmaly.
Öňde duran Ýetginjekleriň gyşky Olimpiýa oýunlarynyň maksatnamasyna täze görnüş bolan 3X3 hokkeý goşuldy. Bu görnüş toparlaýyn bäsleşik bolup, oňa gatnaşyp öz Milli Olimpiýa komitetlerine wekilçilik etmeli türgenler bije arkaly kesgitlenilýär. Milli ýygyndymyzyň kapitany Nowruz Baýhanowyň «Aziýanyň çagalary» halkara ýaryşynda görkezen ýokary ussatlyk derejesi Halkara hokkeý federasiýasy tarapyndan bellenildi. Bu bolsa Nowruzyň Ýetginjekleriň III Olimpiýa oýunlaryna gatnaşmagy üçin Türkmenistanyň Milli Olimpiýa komitetine çagyryş hatynyň gelmegine getirdi. Biz hem ýaş hokkeýçimize öňde duran ýaryşlarda şowly çykyş arzuw edýäris hem-de hormatly Prezidentimiziň ýurdumyzda we dünýäde sporty we olimpiýa hereketini ösdürmek üçin edýän ýadawsyz aladalary, ägirt uly işleri üçin tüýs ýürekden hoşallyk bildirýäris.
www.msy.gov.tm
