Halkara Bitaraplyk güni mynasybetli geçirilen hokkeý boýunça Türkmenistanyň Prezidentiniň kubogyny almak ugrynda ýaryş «Nesil» hokkeý toparynyň ýeňşi bilen tamamlandy.

Bu abraýly hokkeý ýaryşynyň toparçadaky bäsleşiginde öňe saýlanan «Şir» we «Nesil» toparlary finalda duşuşdylar. Netijede, 10:5 hasabynda ýeňiş gazanan «Nesil» hokkeý topary Türkmenistanyň Prezidentiniň kubogyny eýeledi.

Türkmenistanyň Prezidentiniň kubogy ugrundaky ýaryşyň ýeňijisi bolmagy maksat edinip, finala ykjam taýýarlanan toparlar turuwbaşdan erjel oýun görkezdiler. Diýseň çekeleşikli dowam edýän hokkeý bäsleşiginde hasaby ilkinji bolup «Şir» topary açdy.

«Nesil» hokkeý toparynyň hokkeýçileri bada-bat hasaby deňlediler. Şondan soňra olar oýnuň bagyny doly ele aldylar. Şeýlelikde, hasap 2-nji ýarymyň ahyrna çenli 10:1 boldy.

Duşuşygyň 3-nji döwründe «Şir» toparynyň hokkeýçileri biraz ekezlenip başladylar. Netijede, olar arany 10:5-e çenli ýygjamlatdylar. Şol hasap bilen oýun tamamlandy.

Şeýlelikde, «Nesil» Türkmenistanyň Prezidentiniň kubogy ugrundaky ýaryşyň ýeňiji boldy. «Şir» topary 2-nji orny eýeledi. 3-nji orna «Galkan» topary mynasyp boldy.

Şamyrat MUHAMMETGURBANOW,

žurnalist.