Halkara Awtomobil Federasiýasynyň nobatdaky Baş Assambleýasy we onuň çäklerindäki maslahatlar 2019-njy ýylyň 2-6-njy dekabrynda Fransiýanyň Pariž şäherinde geçirildi.
Bu halkara maslahata dünýäniň 140 golaý döwletinden 240 golaý Awtomobil Sport Federasiýalary, Bileleşikleri we dürli hyzmatdaşlary bilen bir hatarda Türkmenistanyň Awtomobil Sport Federasiýasynyň wekilleri hem gatnaşdy.
Türkmenistanyň Awtomobil Sport Federasiýasynyň wekilleri tarapyndan Halkara Awtomobil Federasiýasynyň bölüm müdirleri we ýolbaşçy düzümi bilen birnäçe duşuşyklar geçirildi.
Maslahatyň barşynda oňa gatnaşyjylara awtomobil sporty we ulag ulgamynda Halkara Awtomobil Federasiýasynyň ýöredýän syýasaty, ýollaryň multimodal ulgamyny ösdürmek boýunça amala aşyrýan sebit derejesindäki taslamalarynyň ähmiýeti we gerimleri barada düşünje berýän wideofilmleriň birnäçesi görkezildi.
Umumy maslahatyň dowamynda maslahata gatnaşyjylaryň çykyşlary diňlenildi. Olarda maslahatyň gün tertibine girizilen meseleler hem-de awtomobil sport ulgamynda oňyn hyzmatdaşlygy ösdürmegiň derwaýys meseleleri barada durlup geçildi.
Halkara Awtomobil Federasiýasynyň nobatdaky Baş Assambleýasynyň dowamynda resminamalaryň birnäçesine gol çekildi we maslahata gatnaşyjylaryň arasynda sportyň bu görnüşini ösdürmek ugrunda özara bähbitli hyzmatdaşlygy ösdürmek boýunça degişli işleriň alnyp baryljakdygy barada ylalaşyldy.
www.msy.gov.tm
