2019-njy ýylyň 30-njy noýabrynda 26-njy tapgyryň jemleýji duşuşygy geçirilip, onda «Ahal» öz meýdanynda Türkmenbaşy şäheriniň «Şagadamyny» kabul etdi.
Bu duşuşygy 2:0 hasabynda öz peýdasyna tamamlan «Ahal» 48 utuk toplap, ýaryş tertibinde ikinji orna geçmegi başardy. «Şagadam» toparynyň hem geçirilen duşuşyklarda 48 utuk toplandygyny ýatladýarys, ýöne özaralaryndaky görkezijileriniň hasabynda «Ahal» ikinji orna geçdi.
Ýeri gelende bellesek, ýaryş tertibiniň birinji basgançagyny wagtyndan öň çempionlyk derejesini gazanan «Altyn Asyr» topary eýeleýär.
Ýurdumyzyň futbol çempionatynyň 27-nji tapgyry 7-nji dekabrda geçirilip, onda «Aşgabat» – «Nebitçi», «Şagadam» – «Energetik», «Köpetdag» – «Altyn Asyr» hem-de «Merw» – «Ahal» toparlary duşuşarlar.
