2019-njy ýylyň 30-njy noýabrynda Aşgabat şäherindäki Köpugurly sport toplumynda Halkara Bitaraplyk güni mynasybetli hokkeý boýunça Türkmenistanyň Prezidentiniň kubogy ugrundaky ýaryşyň açylyşy dabarasy geçirildi.
Açylyş dabarasynyň başynda Türkmenistanyň Döwlet senasy ýaňlandy. Şeýle-de, Türkmenistanyň Sport we ýaşlar syýasaty ministriniň orunbasary Gulmyrat Agamyradow çykyş edip, ýaryşa gatnaşýanlary gutlady we Türkmenistanyň Prezidentiniň kubogy ugrundaky ýaryşy açyk diýip yglan etdi.
Soňra buzly meýdança hokkeý ýaryşyna gatnaşýan toparlar çykdy. Olar bilen tanyşlykdan soňra sportuň gyşky görnüşleri bilen meşgullanýan ýaşajyk türgenleriň görkezme çykyşlary tomaşaçylara hödürlenildi.
Türkmen estradasynyň ýaşlaryň söýgüsini gazanan aýdymçylarynyň türkmen sportuny wasp edýän şirin owazlary dabaranyň şowhunyny artdyrdy.
Türkmenistanyň Prezidentiniň kubogy ugrundaky hokkeý ýaryşynyň final duşuşygy 10-njy dekabrda bolar.
Şirin ŞIRLIÝEWA,
«Türkmenistan Sport» halkara žurnalynyň jogapkär kätibi.
Surata düşüren Şamyrat Muhammetgurbanow.
