2019-njy ýylyň 29-njy noýabrynda Birleşen Milletler Guramasynyň wekilhanalarynyň ýolbaşçylary bilen Türkmenistanyň Sport we ýaşlar syýasaty ministri D.Gulgeldiýewiň we Ministrligiň degişli bölümleriniň jogapkär işgärleriniň duşuşygy boldy. Duşuşyga Birleşen Milletler Guramasynyň Türkmenistandaky Hemişelik utgaşdyryjysy Ýelena Panowa we bu abraýly guramanyň Türkmenistandaky jogapkär wekilleri gatnaşdylar.

Türkmenistanyň Sport we ýaşlar syýasaty ministrliginiň edara binasynda guralan duşuşygyň dowamynda Birleşen Milletler Guramasynyň wekilleri ýaşlar syýasaty babatda BMG-nyň başlangyçlary we teklipleri boýunça alnyp barylýan işler hem-de hereket edýän maksatnamalar boýunça pikir alyşdylar.

Şeýle-de, Türkmenistanyň «Ýaşlar barada döwlet syýasaty hakynda» kanunynyň çäklerinde ýurdumyzda ýaşlary zyýanly endiklerden goramak, olaryň psihlogiki we fiziki ýagdaýynyň ösmegini, saglygyny goramak ugrunda özara hyzmatdaşlygy giňeltmegi gazanmak, «Türkmenistanda ýaşlar barada döwlet syýasatynyň 2015-2020-nji ýyllar üçin döwlet Maksatnamasynyň» durmuşa geçirilişiniň netijelerini jemlemek we bu ugurda täze döwlet maksatnamasynyň taslamasyny işläp taýýarlamak barada özara hyzmatdaşlyk etmek meselelerini ara alyp maslahatlaşmak üçin 2019-njy ýylyň dekabrynda «tegelek stol» geçirmek teklip edildi.

Duşuşykda Birleşen Milletler Guramasynyň wekilleri ýaşlar syýasaty ugry babatda BMG-nyň başlangyçlary we teklipleri boýunça alnyp barylýan işler hem-de hereket edýän maksatnamalar boýunça hyzmatdaşlyk etmek barada pikirlerini beýan etdiler.

Geljek hepdede tegelek stoluň başyndaky duşuşygy geçirmek boýunça her tarapdan bellenen jogapkär wekilleriň işçi duşuşygyny geçirmek meýilleşdirilýär.

www.msy.gov.tm