2019-njy ýylyň 19-njy noýabrynda 2020-nji ýylda geçjek dünýä çempionatyna saýlama oýunlaryň ikinji seçip alyş etabynyň altynjy tapgyrynda Türkmenistanyň milli ýygyndysy öz meýdançasynda Şri-Lankanyň ýygyndysyny kabul eder (duşuşyk Aşgabat wagty bilen sagat 16:00-da başlanar).
Türkmenistanyň ýygyndysy mundan birnäçe gün ozal (14.11.2019) Aşgabatda Demirgazyk Koreýanyň ýygyndysyny 3:1 hasabynda ýeňipdi.
Bu ýeňiş türkmen futbolçylarynyň ikinji ýeňşi boldy. Olar saýlama oýunlarynyň ilkinji tapgyrynda myhmançylykda özleriniň şu günki garşydaşlaryndan 2:0 hasabynda üstün çykypdy.
Ildeşlerimiz beýleki geçiren iki duşuşygynda ýeňildiler. Olar öz meýdançalarynda Günorta Koreýaly futbolçylardan (0:2), şeýle hem myhmançylykda Liwandan (1:2) ýeňildiler.
Şri-Lankanyň topary ýaryşy birinji deslapky duşuşyklardan başlady. Ol şonda Makaonyň ýygyndysyny iki oýnuň jemi boýunça (3:0 we 0:1) ýeňdi.
Ýöne topardaky duşuşyklarda adaly futbolçylar häzirlikçe bir utuk hem gazanyp bilenoklar. Olar duşuşyklarynyň 4-sini hem utuldylar. Henize çenli garşydaşlarynyň derwezesine bir topy hem geçirip bilmedik Şri-Lankaly futbolçylar H toparda ýaryş tertipnamasynda iň soňky orunda barýar.
Seýlon adalarynyň futbolçylary öz meýdançasynda geçiren oýunlarynda türkmen futbolçylaryndan (0:2), demirgazyk koreýalylardan (0:1) hem-de liwanlylardan (0:3) utuldylar. Olar myhmançylykda Günorta Koreýanyň ýygyndysy bilen geçiren duşuşyklarynda hem uly hasap bilen (0:8) ýeňildiler.
Sport muşdaklarynyň arasynda uly meşhurlyga eýe bolan www.livesport.ru saýty Türkmenistanyň ýygyndysy öz meýdançasynda toparda iň yzda barýan ýygyndyny uly hasap bilen utar diýip çaklaýar.
