Futbol boýunça Türkmenistanyň milli ýygyndysy dünýä çempionaty 2022-niň saýlama tapgyrynyň çäginde Şri-Lankanyň ýygyndy toparynyň garşysyna ýaşyl köýnekçede çykyş eder.

Şu gün (18.11.2019), Dünýä çempionaty-2022-niň ikinji saýlama tapgyrynyň duşuşygynyň öňüsyrasy «H» toparçada çykyş edýän Türkmenistanyň hem-de Şri-Lankanyň milli ýygyndylarynyň wekilleriniň gatnaşmagynda paýtagtymyzdaky «Sport» myhmanhanasynda ýörite ýygnanyşyk geçirildi.

Onuň dowamynda milli ýygyndylaryň resmi wekillerinden başga duşuşygyň komissary, eminleriň gözegçisi, duşuşygy guraýjylardyr resmi wekiller ertirki oýnuň guramaçylygy bilen bagly maslahat geçirdiler. Mundan başga, ýygnagyň dowamynda ýygyndylaryň çykyş etjek köýnekçeleri mälim edildi. Türkmenistanyň milli ýygyndysy bu duşuşykda ýaşyl köýnekçede çykyş eder. Şri-Lankanyň ýygyndy topary bolsa sary köýnekçe geýer.

Saýlama tapgyrçasynyň «H» toparçasynda çykyş edýän Türkmenistanyň hem-de Şri-Lankanyň milli ýygyndylarynyň arasyndaky duşuşygyň 19-njy noýabrda paýtagtymyzdaky «Köpetdag» stadionynda geçirilýändigini ýatladýarys. Bu duşuşyk 16:00-da başlanýar.