Aşgabat şäherinde ýerleşýän Olimpiýa şäherçesindäki döwrebap sport desgasynda boks boýunça Türkmenistanyň kubogy ugrunda ýaryş geçirilip, şu gün (17.11.2019) onuň jemleri jemlenildi.

Gyzlaryň we oglanlaryň arasynda geçirilen çekeleşikli ýaryşlardan soňra öz agramlarynda ýeňiji bolan boksçularyň atlary belli edildi. Netijede, umumytoparlaýyn ýaryşda Aşgabat şäheri ýeňiji boldy. Daşoguz welaýatynyň boksçulary 2-nji orny eýelediler. Balkan welaýatyna wekilçilik edýän boksçular umumytoparlaýyn bäsleşikde 3-nji orna düşdüler.

Öz agramynda (75 kg.) Türkmenistanyň kubogynyň ýeňijisi bolan Nursähet Pazzyýewiň şu ýaryşda-da, bütin ýylyň dowamynda-da netijeli çykyş edendigi nazara alnyp, ol Türkmenistanyň boks federasiýasy tarapyndan  hem-ä «Ýaryşyň boksçusy», hem-de «Ýylyň boksçusy» diýlip yglan edildi.

Boks boýunça Türkmenistanyň kubogy ugrundaky ýaryş Türkmenistanyň Sport we ýaşlar syýasaty ministrligi bilen Türkmenistanyň boks federasiýasy tarapyndan bilelikde guraldy.

Bäsleşigiň ahyrynda baýrakly orunlary eýelänler guramaçylar tarapyndan Hormat hatlar we ýadygärlik sowgatlar bilen sylaglanyldy.

www.msy.gov.tm