Aşgabatda erkekleriň we zenanlaryň arasynda basketbol boýunça Türkmenistanyň kubogy ugrundaky bäsleşikde ýeňiji bolan toparlar mälim boldy. Mundan öňki basketbol ýaryşlaryna mahsus äheňde çekeleşikli häsiýete eýe bolan ýaryş hem bu oýnuň muşdaklaryny özüne çekdi.
Gyzlaryň arasynda ilki bilen meýdança «Aşgabat 2» we «Balkan» toparlary çykdylar. Netijede duşuşyk 52:28 hasabynda «Aşgabat 2» toparynyň peýdasyna tamamlady. Mary welaýatynyň we Daşoguz welaýatynyň toparlarynyň arasynda geçen duşuşykda 34:33 hasabynda maryly türgenler tapawutlandylar. Gyzlaryň arasyndaky bäsleşikler Lebap welaýatynyň we Aşgabat şäheriniň toparlarynyň oýny bilen jemlendi. Duşuşyk 76:32 hasabynda «Aşgabat 1» toparynyň peýdasyna tamamlandy. Şeýlelikde, Türkmenistanyň kubogy ugrunda gyzlaryň arasyndaky bäsleşikleriň ýeňijileriniň ilkinji üçlügini «Aşgabat-1», Lebap welaýatynyň topary we «Aşgabat -2» toparlary düzdüler.
Erkekleriň arasynda şol gün 3-nji ýer ugrunda Balkan welaýatynyň we Lebap welaýatynyň toparlary bäsleşdiler. Netijede, Lebap welaýatynyň türgenleri garşydaşlaryndan 69:60 hasabynda üstün çykmagy başardylar.
Jemleýji final duşuşygynda «Aşgabat-1» topary bilen Mary welaýatynyň topary bäsleşdiler. Toparlaryň ikisi hem toparlaýyn tapgyry ýeňlişsiz dowam etdirip, ýarym finalda hem üstünlik gazandylar. Bu iki toparlaryň jemleýji duşuşygy hem örän çekeleşikli geçdi. Netijede paýtagtlylar 95:85 hasabynda ýeňiş gazandylar.
Ýeňijilere bäsleşigiň guramaçylary tarapyndan Hormat hatlarydyr sowgatlar gowşuryldy.
«Türkmen sporty» gazeti (16.11.2019)
