«Mançester Sitiniň» baş tälimçisi Pep Gwardiola Çempionlar ligasynda «Şahtýoryň» garşysyna myhmançylykda geçiren duşuşygyna (3:0) gelen janköýerlere topara beren goldawlary üçin minnetdarlyk bildirdi.
Gwardiola topary goldamak üçin Ukraina gelen 114 jankoýeriň hemmesine öz eli bilen hoşallyk bildirip hat ýazdy hem-de olary çempionlar ligasynda 26-njy noýabrda «Şahtýoryň» garşysyna boljak jogap oýnuna çagyrdy.
«Mançester Sitini» goldamak üçin janköýerler 3 müň kilometr töweregi ýol geçdiler. Gwardiola olaryň yhlasyna mynasyp baha berdi hem-de olara ýekänme-ýekän minnetdarlyk bildirmek isledi.
«18-nji sentýabrda seniň özüň bilen wepaly janköýerleriň ýene 113-si biziň Ukrainada «Şahtýoryň» garşysyna nähili çykyş edýänligimizi görmek üçin alys ýola syýahat etdiler. Men size sag bolsun aýtmak üçin şu haty ýazýaryn.
Biz Çempionlar ligasyny ýeňiş bilen başlanymyza diýseň begenýäris. Biziň garşymyza güýçli topar çykdy, ýöne biz öňat oýun görkezdik, oýnuň gidişini elimizde sakladyk hem-de oýnumyza mynasyp ýeňiş gazandyk.
Şol duşuşykda siziň bize eden goldawyňyz örän möhüm ähmiýete eýe boldy. Eger-de janköýerlerimiz bolmasa biz hiç kim diýip men hemişe aýdýaryn.
Hoşallyk hökmünde «Şahtýoryň» garşysyna öz ýerimizde geçirýän duşuşygymyza sizi çagyrmak isleýärin. Biz sizi myhmansöýerlik maksatnamamyza gatnaşmaga çagyrýarys. Oýun 2019-njy ýylyň 26-njy noýabrynda «Etihad» stadionynda bolar.
Oýunçylaryň hem-de toparyň hünärmenleriniň adyndan ajaýyp goldawyňyz üçin size ýene bir gezek hoşallyk bildirýärin!
Pep Gwardiiola»
«Mançester Siti» özüniň indiki duşuşygyny 23-nji noýabrda geçirer. Topar Angliýanyň çempionatynda «Çelsi» bilen duşuşar.
