Türkmen agyr atletikaçysy Atajan Daýyýew agyr atletika boýunça ýaşlaryň hem ýetginjekleriň arasynda Aziýa çempionatynyň soňky gününde bürünç medala mynasyp boldy.
Ol ýetginjekleriň arasynda 102 kilogramdan ýokary agramda şeýle üstünlik gazandy. Ýaryş 19-27 oktýabrda Phenýanda (KHDR) geçdi.
17 ýaşly türkmen türgeni iki görnüş boýunça 325 kg. (silkip götermekde 143kg., itekläp götermekde 182 kg.) netije görkezdi. Silkip götermekde özüniň buýran agramlarynyň ählisini göterip, Atajan Daýyýew bu görnüş boýunça kiçi kümüş medala hem mynasyp boldy.
Koreýa Respublikasynyň türgeni Syn Heon Li 346 kg netije bilen Aziýanyň çempiony boldy. 330 kg. netije görkezen özbegistanly Mirhosil Mirzabaýew kümüş medala mynasyp boldy.
Atajan Daýyýew mundan biraz öň Las-Wegasda geçen agyr atletika boýunça ýetginjekleriň arasynda dünýä çempionatynda kümüş medaly eýeläpdi.
Şeýlelikde, 16 döwletiň türgenleriniň gatnaşmagynda KHDR-de geçen agyr atletika boýunça Aziýanyň birinjiliginde türkmen türgenleri medallaryň altysyna mynasyp boldular.
Öň ýetginjekleriň arasynda 81 kg. çenli agramda çykyş eden Şageldi Baýramgeldiýew silkip götermekde we iki görnüşiň jemi boýunça iki bürünç medaly eýeläpdi.
Şeýle hem «Olimp» sport mekdebiniň 11-nji synp okuwçysy Bektimur Reýimow (ýetginjekleriň arasynda 67 kg. çenli agramda) bilen Türkmen döwlet bedenterbiýe we sport institutynyň 4-nji ýyllyk talyby Rüstem Annaberdiýew (ýaşlaryň arasynda 81 kg. çenli agramda) bu ýaryşda bürünç medala mynasyp boldular.
