Aşgabat şäherindäki «Olimpiýa» myhmanhanasynda Türkmenistanyň sport we ýaşlar syýasaty ministri Daýanç Gulgeldiýew bilen Türkmenistanyň agyr atletika federasiýasynyň başlygy Berdiniýaz Mätiýew agyr atletika boýunça milli ýygyndynyň agzalary bilen duşuşdylar.
Duşuşygyň dowamynda agyr atletikaçylaryň Tokio Olimpiadasyna we Olimpiýa saýlama ýaryşlaryna görýän taýýarlygy barada gürrüň edildi. Hormatly Prezidentimiziň sportuň Olimpiýa görnüşleri boýunça geçirilýän ýaryşlarda üstünlik gazanmak barada öňde goýan wezipelerine jogap edip, Tokio Olimpiadasyna gatnaşmak babatda edilmeli işler maslahatlaşyldy.
Häzirki wagtda ýurdumyzda sportuň dürli görnüşleri, şol sanda agyr atletika bilen meşgullanmaga, milli ýaryşlarda we halkara bäsleşiklerinde çykyş etmäge, olara ýokary derejede taýýarlyk görmäge ähli mümkinçilikler bardyr. Şeýlelikde, Türkmenistanyň agyr atletika boýunça milli ýygyndysynyň agzalary ýurdumyzyň çäginde we daşary ýurtlarda okuw-türgenleşiklerinde bolup, Tokio Olimpiadasyna ykjam taýýarlanmak üçin döredilýän şertlerden doly peýdalanýarlar.
Ýokary netijeleri gazanmak üçin ilki bilen milli ýygyndynyň tälimçileriniň we agzalarynyň agzybirlik bilen işlemelidigi, türgenleriň özara jebisliginiň zerurdygy aýdyldy. Şeýle-de, Türkmenistanyň sport abraýyny ýaryşlarda mynasyp goramagyň agyr atletikaçylaryň iň möhüm borjudygy bellenildi. Munuň özi şu günler türkmenistanly agyr atletikaçylaryň Ýaponiýanyň paýtagtynda guraljak Tomusky Olimpiadanyň saýlama ýaryşlaryna taýýarlanýan wagtlary has-da wajypdyr.
Bu babatda edilýän işleriň öz netijesini berýändigini türkmenistanly ýaşlaryň KHDR-iň paýtagty Phenýanda ýaşlaryň we ýetginjekleriň arasynda geçirilýän dünýä çempionatynda gazanan medallarynyň mysalynda görmek bolýar. Çempionata dünýäniň 16 ýurdundan türgenler gatnaşyp, olaryň hatarynda türkmenistanly agyr atletikaçylar dünýä çempionatynyň medallaryna mynasyp boldular.
