11-nji umumymilli Spartakiadanyň şäher tapgyryna gatnaşýan türgenlere, soňky ýyllaryň dowamynda ýurdumyzyň demirgazyk welaýatynda uly ösüşlere eýe bolan sportuň oýun görnüşleriniň muşdaklary, köp sanly sport söýüjiler giňden goldaw berdiler.

Eminler toparyna ençeme ezber türgenleri ýetişdiren belli tälimçi Baýram Kerimow ýolbaşçylyk etdi. Ýaryşyň final böleginde owadan hem-de tutanýerli oýun görkezen Daşoguz şäheriniň 7-nji ýöriteleşdirilen orta mekdebiniň basketbolçylary birinji orny eýelemegi başardylar.

Olar aýgytly duşuşykda 28-nji ýöriteleşdirilen orta mekdebiň toparyny 29:16 hasabynda ýeňdiler. Ýeňijileriň düzüminde bedenterbiýe mugallymy Züleýha Bazarbaýewadan tälim alýan, bu mekdebiň 11-nji synpynyň okuwçysy, «Türkmenistan sagdynlygyň we ruhubelentligiň ýurdy» atly şygar astynda geçirilen umumilli Spartakiadalaryň birnäçesine gatnaşyp, baýrakly orunlary eýelän Elburs Lazarow tapawutlandy.

Bedenterbiýe mugallymy Ýagşygeldi Toýlyýewiň taýýarlan Daşoguz şäheriniň 28-nji ýöriteleşdirilen orta mekdebiniň basketbolçylary ýeňijilerde bary-ýogy bir utuk yza galdylar. 1-nji ýöriteleşdirilen orta mekdebiň topary 6 utuk toplap baýrakly  üçünji orna mynasyp boldy.

Ysmaýyl IBRAGIMOW.