Aziýa yklymynda 2020-nji ýylda (24-nji fewral – 10-njy mart) Aşgabatda geçiriljek futzal boýunça Aziýa çempionatynyň saýlama ýaryşy dowam edýär.
Ozal habar berşimiz ýaly, Kuweýtiň futzal ýygyndysy 48 ýaşly braziliýaly Rikardo Kamara Sobralyň baştutanlygynda Aziýanyň çempionatynyň final böleginde oýnamaga hukuk gazandy. 
Bahreýniň paýtagty Manamada guralan saýlama ýaryşda Kuweýtiň ýygyndysy Palestinadan (7:1), BAE-den (4:1) we Yrakdan (4:1) üstün çykdy. Ýöne kuweýtli futzalçylar Bahreýniň ýygyndysyndan asgyn geldiler-0:2.
Aziýanyň çempionatynyň final böleginde çykyş etmäge Liwanyň ýygyndysy hem hukuk gazandy. Olar Omanyň ýygyndysyndan 10:2, Saud Arabystanynyň ýygyndysyndan 2:1 hasabynda üstün çykdylar.
Bahreýniň Madinat-Isa şäherinde saýlama ýaryşlaryň dowam edýändigini ýatladýarys.