Türkmenbaşyda, Maryda we Aşgabatda geçirilen 3 duşuşyk bilen Türkmenistanyň futbol çempionatynyň ýokary ligasynyň 21-nji tapgyryna badalga berildi. «Altyn asyr» myhmançylykda «Aşgabatdan» üstün çykdy. «Şagadam» bilen «Energetik» bolsa Balkan we Mary welaýatlarynyň derbisinde ýeňiş gazandy – diýip, «www.turkmenportal.com» saýtynyň sport synçysy habar berýär. 
Paýtagtymyzda geçirilen oýunda ýurdumyzyň çempiony «Altyn asyr» «Aşgabada» ilki derwzesine gol geçirtse-de, soňlugy bilen ýeňşini baýram etdi – 3:1. Bu ýeňişden soňra Ýazguly Hojageldiýewiň tälim berýänleri 47 utuk bilen 1-nji orny eýelemegini dowam etdirýärler. «Aşgabat» 20 utuk bilen 6-njy basgançakda barýar.
2018-nji ýylda AFK-nyň kubogynyň finalyna çykan ýurdumyzyň 5 gezek çempiony «Altyn asyryň» oýnuna «Nisa» stadionynyň münberinden Türkmenistanyň milli ýygyndysynyň ozalky oýunçysy Dmitriý Homuha hem syn etdi. Russiýanyň at gazanan tälimçisi diýen ady göterýän ildeşimiz Russiýanyň ýetginjekler (17 ýaşa çenli) ýygyndysynyň uly tälimçisi wezipesinde işleýär.
Maryda geçirilen oýun welaýatyň derbisi bolup, bu ýerde «Energetik» «Merwden» 3:2 hasabynda üstün çykmagy başardy. Nobatdaky tapgyrda ýeňiş gazanandygyna garamazdan, «Energetik» 25 utuk bilen 5-njy orunda galmagyny dowam etdirýär. Bary-ýogy 8 utuk toplan «Merw» ýaryş tablisasynda iň soňky orny eýeleýär. 
Ýene bir derbi Balkan welaýatynda boldy. Türkmenbaşy şäherinde ýerli «Şagadam» «Nebitçini» kabul etdi. Ýer eýeleri çekeleşikli geçen oýunda 2:1 hasabynda ýeňiş gazandylar. Bu ýeňişden soňra «Şagadam» 41 utuk bilen 2-nji ornuny saklap galýar. «Nebitçi» bolsa 20 utuk toplap, 7-nji orna eýelik edýär. 
Türkmenistanyň futbol çempionatynyň 21-nji tapgyry Aşgabatda ýekşenbe güni geçiriljek duşuşyk bilen tamamlanar. Şol oýunda «Köpetdag» öz meýdançasynda «Ahaly» kabul eder.