Türkmen futzalçylary 2020-nji ýylyň 24-nji fewraly ― 10-njy marty aralygynda Aşgabat şäherinde geçiriljek futzal boýunça Aziýa çempionatynyň saýlama ýaryşyna taýýarlanýarlar.
Çempionatyň guramaçysy hökmünde Türkmenistanyň futzal ýygyndysy yklym ýaryşynyň final böleginde çykyş etmäge  eýýämden hukuk gazandy. Şeýle-de bolsa, ýaryşyň düzgünnamasyna görä, ony kabul edýän döwletiň milli ýygyndysy hem saýlama duşuşyklara gatnaşýar.
Saýlama tapgyryň Merkezi zolagynyň «B» toparçasynda çykyş edýän türkmen futzalçylary eýranly we gyrgyzystanly bäsdeşleri bilen duşuşarlar. 
Aziýanyň futbol konfederasiýasy (AFK) Eýranda geçiriljek bu duşuşyklaryň wagtyny kesgitledi. 
AFK-nyň resmi saýtynda berilýän habara görä, Türkmenistan saýlama tapgyrdaky ilkinji duşuşygyny 23-nji oktýabrda Eýranyň ýygyndysy bilen geçrer. 24-nji oktýabrda bolsa ildeşlerimiz Gyrgyz Respublikasynyň ýygyndysynyň garşysyna meýdança çykarlar. Eýran bilen Gyrgyz Respublikasynyň ýygyndysy 25-nji oktýabrda duşuşar. 
 Türkmen futzalçylary saýlama tapgyryň duşuşyklaryndan ozal Türkiýe Respublikasynda okuw-türgenleşik ýygnanyşygyny geçirerler.