Türkmenistanyň Sport we ýaşlar syýasaty ministrliginiň «Türkmenistan Sport» halkara žurnalynyň redaksiýasynyň ýanynda hereket edýän Žurnalistleriň döredijilik birleşmesiniň nobatdaky ýygnanyşygynda edebiýatyň we žurnalistikanyň umumylyklary, şeýle-de futbol bilen futzalyň aýratynlyklary hakynda pikir alşyldy.

Žurnalistleriň döredijilik birleşmesiniň Türkmenistanyň Sport we ýaşlar syýasaty ministrliginde tassyklanan meýilnamasyna laýyklykda guralan ýygnanyşyk Ýaş olimpiýaçylary taýýarlaýyş sport mekdebiniň Mejlisler zalynda geçirilip, oňa ýokary okuw mekdepleriniň žurnalistika hünäriniň talyplary we habar beriş serişdelerinde zähmet çekýän ýaşlar gatnaşdylar.

Türkmenistanyň halk ýazyjysy Hudaýberdi Diwangulyýew bilen “Biznes reklama” gazetiniň baş redaktory, şahyr Seýitmyrat Geldiýew döredijilik birleşmesiniň gün tertibindäki çekişme häsiýetli meseleler barada öz pikirlerini beýan etdiler.

 Türkmen döwlet bedenterbiýe we sport institutynyň mugallymy Şamuhammet Nepesow, “Türkmenistan Sport” halkara žurnalynyň jogapkär kätibi Şirin Şirliýewa, “Türkmenistan” gazetine wekilçilik eden žurnalist we şahyr Rahmanberdi Gökleňow talyplara we ýaşlara Aşgabatda geçiriljek futzal boýunça Aziýanyň çempionatyny şöhlelendirmek boýunça we sport bilen žurnalistikanyň baglanyşygy dogrusynda gyzykly gürrüňleri berdiler.

Hormatly Prezidentimiziň halypa-şägirtlik ýörelgesine eýerip, ýaşlary hünäre ugrukdyrmak baradaky tabşyryklaryndan ugur alnyp geçirilen bu duşuşygyň dowamynda tejribeli žurnalistler bilen ýaşlaryň arasynda sowal-jogap alşyldy. Duşuşyga gatnaşanlar dürli ugurda, şol sanda döredijilik babatda kämilleşmäge ähli mümkinçilikleri döredýän hormatly Prezidentimize hoşallyklaryny bildirler.

Hoşgeldi SERDAROW,

Türkmen döwlet bedenterbiýe we sport institutynyň

sport žurnalistikasy hünäriniň talyby.

Surata düşüren Iner POTDYÝEW.