Şu hepde Aşgabatda Türkmenistanyň başlyklyk etmeginde GDA-nyň döwlet Baştutanlarynyň Geňeşiniň mejlisi geçer.
Soňky ýyllarda ýurdumyz ençeme gezek GDA-nyň howandarlygynda möhüm duşuşyklaryň hem-de maslahatlaryň geçirilen ýerine öwrüldi. Şol çäreler bolsa ýokary guramaçylyk derejesi bilen tapawutlandy. Şu ýyl hem Türkmenistanyň başlyklyk etmeginde anyk netijeleri gazanmaga gönükdirilen möhüm çäreleriň birnäçesi geçirildi. Şolaryň hatarynda GDA-nyň hökümet Baştutanlarynyň Geňeşiniň mejlisi bar. Şol çäreler örän netijeli boldy.
Hormatly Prezidentimiz Gurbanguly Berdimuhamedow ýurdumyzyň öz dostlary we hyzmatdaşlary üçin hemişe açykdygyny nygtady. Bitarap Türkmenistan Arkalaşygyň çäklerinde däp bolan gatnaşyklara ygrarly bolmak bilen, taryhyň dowamynda kemala gelen, GDA agza döwletleriň halklaryny birleşdirýän dostluk we hoşniýetli goňşuçylyk gatnaşyklaryny pugtalandyrmaga hemmetaraplaýyn ýardam berýär. Ýurdumyz şu ýyl GDA-da başlyklyk etmek bilen, bu wezipäni ýerine ýetirmäge örän jogapkärli çemeleşip, köpugurly döwletara gatnaşyklary işjeňleşdirmek ugrunda çykyş edýär.
Şunuň bilen bir hatarda, ynsanperwer ulgamyň GDA-nyň döwletlerini we halklaryny ygtybarly baglanyşdyryjy ugur bolup durýandygy bellenildi. Şu ýylyň maý aýynda türkmen paýtagtynda geçirilen GDA-nyň döredijilik we ylmy intelligensiýasynyň XIV forumy hem bilim, ylym we medeniýet ulgamlarynda özara peýdaly gatnaşyklary çuňlaşdyrmaga ýardam etdi. GDA-nyň ýerine ýetiriji komitetiniň başlygy Sergeý Lebedew şu ýylyň awgustynda «Awaza» milli syýahatçylyk zolagynda geçirilen birinji Hazar ykdysady forumynyň ähmiýetini aýratyn belledi. Şol foruma GDA ýurtlarynyň ählisiniň diýen ýaly wekilleri gatnaşdylar.
GDA-nyň döwlet Baştutanlarynyň Geňeşiniň mejlisi özara bähbitli hyzmatdaşlyk, şol sanda söwda-ykdysady, ulag we kommunikasiýalar, energetika, öňdebaryjy tehnologiýalar ýaly möhüm ulgamlarda hem-de beýleki ugurlarda gatnaşyklara täzeden güýçli itergi berer hem-de ahyrky netije-de GDA-nyň ýurtlarynyň arasynda umumy abadançylygyň we ösüşiň bähbitlerine laýyk gelýän dostluk gatnaşyklarynyň hem-de netijeli hyzmatdaşlygyň mundan beýläk-de ösdürilmegine ýardam berer.
