«Türkmenistan Sport » halkara žurnalynyň üçünji sany ýurdumyzyň Garaşsyzlygynyň 28 ýyllygy baýramyna gabatlanyp çapdan çykdy – diýip «Нейтральный Туркменистан» gazeti habar berýär.
Bu neşir okyjylarymyzy ýurdumyzyň bedenterbiýe we sport durmuşy, türkmen türgenleriniň halkara ýaryşlara taýýarlanyşy, türgenlerimiziň halkara ýaryşlarda gazanan netijeleri, şeýle hem sportda dünýä belli türgenler hakynda habarlar bilen tanyş eder.
Neşiriň üçünji sanyny «Независимость Туркменистана: физкультурно-спортивное измерение» atly makala açýar. Makalada Garaşsyzlyk ýyllarynda ýaşaýşymyzyň ähli ulgamynda, şol sanda sportda gazanylan uly netijeler beýan edilýär.
Futbol hakyndaky tema hem neşiriň sahypalarynda giňden şöhlelendirilipdir. Ilkinji nobatda Russiýanyň Astrahan şäherinde 12 ýaşa çenli ýetginjek türgenleriň arasynda geçirilen «Hazar kubogy 2019» atly ýaryşda gazanylan üstünlikden söhbet açylýar. Bu hakynda «Ýetginjek futbolçylaryň altyn ýeňşi» atly makaladan tanşyp bilersiňiz.
Millionlaryň oýny bolan futbol hakyndaky gürrüň braziliýaly Pele we argentinaly Maradona hakyndaky materiallarda dowam etdirilýär. Şeýle-de, futboly saýlan woleýbolçy ýagny, «Zenitiň» we Eýranyň ýygyndysynyň hüjümçisi Serdar Azmun bilen bolan söhbetdeşligi okap bilersiňiz.
Şeýle hem žurnalyň bu sanynda sportuň Ýaponiýada dörän Olimpiýa görnüşleri, Aşgabadyň «Bagtyýarlyk» sport toplumy, sagdyn iýmitlenmek hakyndaky makalalar çap edilipdir.
