Kataryň paýtagty Dohada Ýeňil atletika boýunça dünýä çempionaty başlanýar. Bu barada Ýeňil atletika federasiýalarynyň halkara assosiasiýasynyň resmi saýtynda habar berildi.

Dohadaky 40 müň tomaşaçylyk «Halifa» stadionynda geçiriljek ýaryşlaryň dowamynda ýeňil atletikanyň 49 ugry boýunça medallaryň eýeleri belli ediler.

2019-njy ýyldaky Ýeňil atletika boýunça dünýä çempionatynyň baýrak gaznasy 7, 53 million dollara barabar bolupdyr.

Şahsy ýaryşlaryň ýeňijileri 60 müň, kümüş medalyň eýesi 30 müň, bürünç medal alan bolsa 20 müň amerikan dollary bilen sylaglanar.

 Estafetada ýeňiji bolan topara 80 müň amerikan dollary gowşurylar. 2-nji we 3-nji ornuň baýragy degişlilikde 40 müň we 20 müň amerikan dollary bolar.

Mundan başga-da, dünýä rekordy üçin uly baýrak, ýagny 100 müň amerikan dollary bilen sylaglamak göz önüne tutulýar.

Ýeňil atletika boýunça dünýä çempionaty 27-nji sentýabrdan 6-njy oktýabrda çenli dowam eder.