Futzal boýunça Horwatiýanyň Poreç şäherinde geçirilýän «Futsal Week Autumn Cup – Croatia 2019» halkara ýaryşyna gatnaşýan Türkmenistanyň milli ýygyndysy finala çykmagy başardy.
Milli ýygyndymyz halkara ýaryşyndaky ikinji duşuşygyny Çernogoriýanyň ýygyndy toparynyň garşysyna geçirdi. Horwatiýaly tälimçi Robert Grdowiçiň tälim berýän ýygyndy toparymyzyň hüjümlerinde geçen bu duşuşyk 6:3 hasabynda futzalçylarymyzyň peýdasyna tamamlandy. Ýygyndymyza ýeňiş getiren gollary Allaberdi Meredow, Öwezbaý Muhammetmyradow, Watan Ataýew, Mülkaman Annagulyýew, Allamyrat Gurbanow hem-de Maksat Myradow geçirmegi başardylar. Türkmen futbolçylary birinji oýunda Norwegiýanyň ýygyndysy bilen deňme-deň oýnadylar (1:1).
Şeýlelikde, milli ýygyndymyz 4 utuk toplap «A» toparçanyň ýeňijisi boldy. Milli ýygyndymyz aýgytlaýjy duşuşykda Belgiýanyň ýygyndysy bilen duşuşar.
Norwegiýanyň ýygyndysy bilen geçiren duşuşygyny 3:2 hasabynda öz peýdasyna tamamlan Çernogoriýanyň milli ýygyndysy toparçada ikinji orny eýeläp, 3-nji orun ugrunda güýç synanyşmaga hukuk gazandy.
FINAL (25.09.2019 )
Türkmenistan-Belgiýa
3-NJI ORUN UGRUNDAKY DUŞUŞYK
Çernogoriýa-Saud Arabystany
