Sentýabryň ikinji ýarymynda ýurdumyzyň türgenleri dünýäniň dürli künjeklerinde geçirilýän iri halkara ýaryşlarynyň birnäçesine gatnaşýarlar.
Şol ýaryşlaryň biri, boks boýunça dünýä çempionaty bolup, ol Russiýanyň Ýekaterinburg şäherinde sentýabr aýynyň 22-sine tamamlanar.
Şondan bir gün soň, has takygy sentýabryň 23-ine Indoneziýada stol tennisi boýunça Aziýanyň çempionaty jemlener.
Taýlandyň Pataýa şäherinde 27-nji sentýabrynda tamamlanýan geçýän agyr atletika boýunça dünýä çempionatynda ildeşlerimiz Olimpiýa ýollanmalary ugrunda göreşýärler.
Sentýabryň 16-syna Horwatiýanyň Poreç şäherinde badalga alan futbol boýunça halkara ýaryşynda türkmen futbolçylary hem çykyş edýärler. Bu ýaryş 10 günläp dowam eder.
Şeýle hem ildeşlerimiz Çiliniň Santýago şäherinde sentýabryň 17-sine başlan karate-do boýunça A seriýaly halkara ýaryşyna hem gatnaşýarlar. Bu ýaryş 29-njy sentýabrda tamamlanar.
Karate-do boýunça ýene-de bir iri halkara ýaryş Türkiýäniň Stambul şäherinde geçiriler. 22-30-nji sentýabr aralygynda geçjek bu ýaryşda ýurdumyzyň ezber karateçileri ussatlyklaryny görkezerler.
Ildeşlerimiz sentýabr aýynyň aýagynda karate-do boýunça ýene iki ýaryşa gatnaşarlar. Meksikanyň Monterreý şäherinde geçjek halkara ýaryşy 25-nji sentýabrda başlap, 1-nji oktýabrda tamamlanar.
Sportuň bu görnüşi boýunça Azerbaýjanyň paýtagty Baku şäherinde boljak beýleki bir halkara ýaryşy 27-29-sentýabr aralygynda geçiriler.
Gazagystanyň Nur-Sultan şäherinde 18-nji sentýabrda grek-rim göreşi boýunça dünýä çempionatynyň jemi jemlendi hem-de şol günüň özünde bu ýerde erkin göreş boýunça dünýä çempionaty başlandy. Ýurdumyzyň iň ezber pälwanlarynyň gatnaşmagynda geçýän bu iri halkara ýaryşy 22-nji sentýabrda tamamlanýar.
Türkmenistanyň kikboks boýunça ýygyndysy 18-nji oktýabrda Russiýanyň Anapa şäherine bardylar. Ildeşlerimiz bu ýerdäki okuw-türgenleşik ýygnanyşygyna hem-de dünýä kubogy ugrundaky ýaryşa gatnaşarlar. Bu ýaryş 29-njy sentýabra çenli dowam eder.
Ýurdumyzyň küştçileriniň öňünde hem diýseň jogapkärli ýaryş bar. Ildeşlerimiz sentýabr aýynyň soňky ongünlüginde Özbegistanyň paýtagty Daşkentde geçjek Merkezi Aziýanyň çempionatyna gatnaşarlar.
Şeýle hem Daşkent şäheri sentýabr aýynyň 20-22-sine dzýudo boýunça halkara ýaryşyny kabul eder. Ýurdumyzyň iň ezber dzýudoçylary bu ýaryşda Türkmenistan döwletimiziň sport abraýyny gorarlar.
Kataryň paýtagty Dohada geçjek ýeňil atletika boýunça dünýäniň kubogy ugrundaky ýaryş 23-nji sentýabrda başlanyp, 7-nji oktýabra çenli dowam eder.
24-nji sentýabrda Hindistanyň Bengaluru şäherinde suwda ýüzmek boýunça Aziýa çempionatyna badalga berler. Bu ýaryşyň jemi 2-nji oktýabrda jemlener.
