Aşgabat şäheriniň Büzmeýin etrabyndaky 3-nji sport mekdebinde Gündogaryň başa-baş söweş görnüşleriniň biri bolan kýokuşinkaý karate boýunça ýaryş geçirildi. Aşgabat şäheriniň sport we ýaşlar syýasaty Baş müdirliginiň tassyklan meýilnamasy esasynda geçirilen bäsleşige büzmeýinli türgenlerden başga-da Aşgabat şäheriniň 4-nji sport mekdebinden «Gökje» toparynyň we Ýaşlyk şäherçesinden «Ýaşlyk» toparynyň ýaş türgenleri gatnaşdy.

Türkmenistanly ýaşlaryň arasynda uly meşhurlykdan peýdalanýan bu sport görnüşi bilen gyzlaryň hem meşgullanýandygy aýratyn bellenilip geçilmäge mynasypdyr. Ine, tutluşyklaryň netijesinde birinji orny eýelän we ýaryşyň iň ýaş türgeni diýen ýörite baýraga hem ezber türgen gyz mynasyp boldy. Ýagny bu üstünligi «Gökje» toparyndan tälimçi Annamuhammet Muhammetnazarowyň şägirdi Oraznabat Annaorazowa gazanmagy başardy. Şeýle-de, 4-nji sport mekdebiniň bu toparyndan Ogulşat Çaryýewa, Dürjemal Mämmedowa, Şirin Çaryýewa, Mergen Mämmedow, Bezirgen Baýramow, Resul Annaorazow, Alym Hydyrow we Sähetdurdy Piralyýew dagy ýaryşy ýeňiş bilen tamamlady.

Elbetde, ýer eýesi hökmünde çykyş eden 3-nji sport mekdebiniň türgenleri-de köp sanly medal gazanmagy başardylar. Olardan Ybraýym Ataýew, Meretmuhammet Myradow, Allanur Duşenow, Daýanç Amanow, Daýanç Baýramow we Esger Orazmyradow ýaly öňdäki orny eýelän türgenleri görkezmek bolar. Büzmeýinli türgenleri ýaryşa 3-nji sport mekdebiniň tejribeli tälimçisi Perhat Nurmuhammedow taýýarlady. Ýaşlyk şäherçesinden tälimçi Röwşen Şamyradowyň şägirtleri-de kýokuşinkaý karate sungatynyň owadan tilsimlere baý hereketlerini görkezip, baýrakly orunlar ugrunda göreşdiler. Netijede Mähriban Atajanowa, Aýşanur Döwranowa, Mergen Ataýew, Ýakup Handurdyýew we Oraz, Eziz Orazmedowlar ýaryşyň ýeňijisi boldular. Şeýle-de, gapdal eminler Gülşirin Orazmyradowa, Begençmyrat Suwhanow, Kerim Pürliýew ýaly karate ussatlary ýaryşyň guramaçylykly geçmegine mynasyp goşant goşdular.

Leýla ERGEŞOWA,

S.A.NYÝAZOW adyndaky TOHU-nyň mugallymy