«Pähim-paýhas ummany Magtymguly Pyragy» ýylynda ýurdumyzyň ýokary okuw mekdepleriniň talyp ýaşlarynyň arasynda Halkara Bitaraplyk güni mynasybetli sportuň innowasion ugurly fijital we kibersport görnüşlerinden ýaryşlara badalga berildi. Bäsleşigiň açylyş dabarasyna Türkmen döwlet bedenterbiýe we sport institutynyň professor-mugallymlary, talyplary, ýurdumyzyň ýokary okuw mekdepleriniň wekilleri gatnaşdylar.

Türkmen döwlet bedenterbiýe we sport institutynyň guramagynda geçirilýän bu ýaryşlarda talyp türgenler sportuň innowasion ugurly fijital görnüşleri boýunça özara bäsleşerler. Talyp türgenler fijital-futbol, fijital-basketbol, fijital-stol tennisi, fijital-küşt we kibersport boýunça öz başarnyklaryny görkezerler.

Innowasion ugurly fijital we kibersport görnüşli ýaryşlary Türkmen döwlet bedenterbiýe we sport institutynyň Sportuň olimpiýa görnüşleri fakultetiniň köpugurly sport toplumynda we fijital sport otagynda dowam eder.

Türkmen döwlet bedenterbiýe we sport institutynyň we ýurdumyzyň ýokary okuw mekdepleriniň talyplarynyň arasyndaky bäsleşikler 2024-nji ýylyň 7-nji dekabrynda tamamlanar. Şol gün sportuň innowasion ugurly fijital we kibersport görnüşlerinden ýaryşlar jemlener we ýeňijileri sylaglamak dabarasy geçiriler.