«Arkadag» futbol topary Türkmenistanyň çempiony diýen ady saklap galdy. Döwlet derejeli şäheriň adybir topary milli çempionat gutarmazdan bäş tapgyr öň Balkanabadyň «Nebitçi» toparyny 28-nji tapgyryň soňa goýlan duşuşygynda 5:1 hasabynda utup, şu üstünligi möhletinden öň gazandy.
Türkmenistanyň milli ýygyndysynyň esasy düzümini emele getirýän «Arkadag» futbol topary 2023-nji ýylda döredilipdi, ol ilkinji gezek çykyş eden ýylynda goşa üstünlik gazandy, Türkmenistanyň çempionatynda ýeňdi we Kubogyny eýeledi. Döredileli bäri bu toparyň milli çempionatyň resmi duşuşyklarynda ýekeje utuk hem ýitirmändigini we ikinji gezek Türkmenistanyň çempiony bolandygyny bellemelidiris. Türkmenistan milli ýygyndysynyň 44 ýaşly ozalky tanymal hüjümçisi, Groznynyň «Terek» toparynyň düzüminde 2003/04-nji ýylda Russiýanyň Kubogynyň eýesi we «Balkan» toparynyň düzüminde 2013-nji ýylda AFK-nyň Prezidentiniň Kubogynyň eýesi Wladimir Baýramow «Arkadag» toparynyň baş tälimçisi hökmünde bu üstünlige ýetirdi.
23 duşuşykdan soň 52 utuk bilen ikinji we üçünji orny paýlaşýan «Altyn asyr» we «Ahal» topary kümüş medallar ugrunda bäsleşýärler.
«Arkadag» topary häzirki wagtda halkara ýaryşa ykjam taýýarlyk görýär. Bilşimiz ýaly, Türkmenistanyň çempionynyň AFK-nyň Çagyryş ligasynyň garşydaşlary Maldiw adalarynyň «Maziýa», Gyrgyz Respublikasynyň «Abdyş-Ata» hem-de Kuweýtiň «Al-Arabi» toparlarydyr. Deslapky tapgyryň «B» toparçasyndaky duşuşyklar 26-njy oktýabr – 1-nji noýabr aralygynda Kuweýtde merkezleşdirilen görnüşde geçiriler.
«Türkmen sporty» gazeti
