Türkmenistanda Arkadag Serdarly bagtyýar ýaşlar ýyly diýlip yglan edilen 2023-nji ýylyň jemlerini jemlemek bilen, döwlet Baştutanymyz 30-njy noýabrda bolup geçen Ministrler Kabinetiniň mejlisinde dekabryň ahyrynda Aşgabatda Ýaşlaryň ylmy-amaly maslahatynyň we sergisiniň geçiriljekdigini, onda türkmen ýaşlarynyň bilimde, ylymda, halkara sport bäsleşiklerinde, mekdep okuwçylarynyň we talyplarynyň olimpiadalarda gazanan üüstünlikleriniň, ýaşlaryň ykdysadyýetiň dürli çygyrlarynda gazanan netijeleriniň jemleriniň jemlenjekdigini belledi.
2023-nji ýylyň 27-nji dekabrynda Arkadag Serdarly bagtyýar ýaşlar ýylynyň jemlerine bagyşlanan Halkara ylmy-amaly maslahaty we sergini geçirmegiň öňüsyrasynda Türkmenistanyň Prezidenti Serdar Berdimuhamedowyň «Ýaşlar ― Watanyň daýanjy» diýen kitaby çapdan çykdy.
Kitabyň ilkinji nusgasyny döwlet Baştutanymyz Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa sowgat hökmünde iberdi.
«Arkadag Serdarly bagtyýar ýaşlar ýylynyň tamamlanyp barýan günlerinde men hem özümiň türkmen ýaşlarynyň durmuşyna, ykbalyna, ähli ugurlarda gazanan üstünliklerine bagyşlap ýazan «Ýaşlar — Watanyň daýanjy» atly kitabymy uly hormat bilen sowgat hökmünde Size iberýärin» diýip, döwlet Baştutany Türkmenistanyň ýokary halk häkimiýetiniň ýolbaşçysyna iberen hatynda belleýär.
Gahryman Arkadagymyz hormatly Prezidentimiz, Arkadagly Gahryman Serdarymyzy «Ýaşlar — Watanyň daýanjy» atly ilkinji kitabynyň çapdan çykmagy bilen gutlap, Täze ýylyň bosagasynda kitabyň ilkinji nusgasyny sowgat almagyň özünde buýsanç duýgularyny oýarandygyny belledi.
Türkmenistanyň Prezidenti Serdar Berdimuhamedowyň kitaby Türkmenistanyň ýaşlarynyň ählisi üçin gündelik işlerinde möhüm amaly gözükdiriji, özlerine we durmuş gymmatlyklarynyň binýadyny goýujy ýörelgelere ynamlylygy terbiýelemekde gollanma bolar.
