Hytaýyň çempionatynda möwsümiň başyndan bäri ýekeje gezek ýeňlişe sezewar bolan «Şandun Taýşan» öz meýdançasynda Ýaponiýanyň çempionatynda «Wissel Koba» bilen çempionlyk ugrunda göreşýän «Ýokogama F.Marinos» klubuny kabul etdi. Bu oýnuň esasy aýratynlygy, ol AFK-nyň Çempionlar ligasynyň toparçadaky bäsleşiginiň birinji aýlawynda iň köp tomaşa edilen duşuşyk boldy.
«Jinan Olympic Sports Center Stadium» diýip atlandyrylan 56 müň adama niýetlenilen stadiona baryp, şol oýna 43 783 tomaşaçy janköýerlik edipdir. AFK-nyň Çempionlar ligasynyň toparçadaky oýunlaryna iň köp tomaşa edilen oýunlaryň ilkinji 10-lugyna Türkmenistanyň çempiony «Ahal» topary hem girýär. 20 müň tomaşaçy ýerleşýän «Aşgabat» köpugurly stadionynda guralan oýna 19 müň 966 janköýeriň tomaşa edendigi habar berilýär.
Meşhur Ronaldunyň çykyş edýän «Al-Nassr» kluby öz meýdançasyndaky duşuşyklary 25 müň adamlyk «Mrsul Park» stadionynda geçirip, «Istiklol» we «Al-Duhail» bilen geçirilen oýunlara 20 müňden sähel köpräk tomaşaçy ýygnanypdyr.
Düzüminde Neýmar we Mitrowiç, Kulibali ýaly ençeme ýyldyzlary jemleýän «Al-Hilalyň» öz meýdançasyndaky oýna 26 müňden gowrak janköýer barypdyr. Şol duşuşyk bolsa 67 müň janköýeri ýerleşdirip bilýän Korol Fahd adyndaky halkara stadionda guralypdyr.
«7/24.tm»
