«Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergisiniň we ylmy maslahatynyň çäklerinde «Türkmenistan — bagtyýar, sagdyn we ruhubelent ýaşlaryň ýurdy» atly şygar bilen ýurdumyzyň welaýatlarynda, Aşgabat we Arkadag şäherlerinde bedenterbiýe-sport we sagdyn durmuş çäreleri geçirildi.
2023-nji ýylyň 8-nji oktýabrynda Döwletliler köşgünde terbiýelenýän çagalaryň, Ýaş olimpiýaçylary taýýarlaýan we umumybilim berýän orta mekdepleriň okuwçylarynyň, welosport boýunça Türkmenistanyň ýygyndy toparynyň türgenleriniň we ýokary okuw mekdepleriniň talyp ýaşlarynyň gatnaşmagynda Çandybil şaýoly bilen Bekrewe köçesiniň çatrygyndaky «Welosiped» binasynyň ýanyndan ugur alyp, Bekrewe köçesiniň ugry bilen pellehana «Ylym» binasyna çenli köpçülikleýin welosipedli ýöriş geçirildi.
2023-nji ýylyň 8-nji oktýabrynda Köpetdag şaýolunyň ugrunda Aşgabat şäheriniň umumybilim berýän orta mekdepleriniň okuwçylarynyň, ýokary okuw mekdepleriniň talyp ýaşlarynyň hem-de ýurdumyzyň ministlikleriniň, pudaklaýyn dolandyryş edaralarynyň we jemgyýetçilik guramalarynyň işgärleriniň gatnaşmagynda köpçülikleýin estafeta ylgaw ýaryşy guralyp, ol ýaşlarda uly gyzyklanma döretdi.
2023-nji ýylyň 8-nji oktýabrynda Aşgabat şäheriniň Olimpiýa şäherjiginiň açyk futbol meýdançasynyň ýeňil atletika ýodasynda Aşgabat şäheriniň umumybilim berýän orta mekdepleriniň okuwçylarynyň, ýokary okuw mekdepleriniň talyp ýaşlarynyň hem-de ýurdumyzyň ministlikleriniň, pudaklaýyn dolandyryş edaralarynyň we jemgyýetçilik guramalarynyň işgärleriniň gatnaşmagynda köpçülikleýin kross ýaryşynyň geçirilmegi baýramçylygyň bosagasyndaky çäreleriň dowamy boldy.
2023-nji ýylyň 8-nji oktýabrynda ýurdumyzyň welaýatlarynda sport mekdepleriň ýaş türgenleriniň we umumybilim berýän orta mekdepleriň okuwçylarynyň, hünär-tehniki, orta we ýokary hünär okuw mekdepleriniň talyp ýaşlarynyň, edara-kärhanalaryň we guramalaryň işgärleriniň gatnaşmagynda köpçülikleýin welosipedli ýörişler hem-de estafeta we kross ýaryşlary geçirilip, baýramçylyk ata Watanymyzyň ähli künjeginde dabaralara beslendi.
«7/24.tm»: № 41 (176), 2023
Surata düşüren Dörtguly MYRATGULYÝEW.
